44 günlük müharibə gedən günlərdə “Qarabağ”ın mətbuat xidmətinin rəhbəri Nurlan İbrahimovun emosiyaların təsiri altında yazdığı status ermənilərə nə azı “Bayraktar” qədər təsir etdi.

Onların şikayəti əsasında UEFA Nurlan bəyin futboldan ömürlük uzaqlaşdırılmasına qərar verdi. Artıq məsələnin üzərindən iki ilə yaxın müddət keçib. Cəzadan narazı qalan İbrahimovun İdman Arbitraj Məhkəməsinə müraciət etdiyini də bilirsiz. Dinləmə prosesi də olub. Amma qurum indiyədək bir neçə dəfə qərar tarixini dəyişib. Məsələnin mayın 25-də həll olunacağına ümid bəsləyirdik. Görünür, yenə bir müddət gözləməli olacağıq. Bu haqda məlumatı "Football-plus.az" saytına açıqlamasında Nurlan İbrahimovun vəkili Fərid Haqverdiyev verdi. Fərid bəy qərar tarixinin iyulun 7-nə qədər uzadıldığını qeyd etdi. Bu yerdə deməyə bir söz qalır: Allah Nurlan İbrahimova səbr, İdman Arbitraj Məhkəməsinə insaf versin!

SƏNƏM FƏRHADOVA