Rusiyanın Ukraynaya təcavüzündən futbol da əziyyət çəkir
Dünya Rusiyanın Ukraynaya hərbi təcavüzünün 24-cü gününü yaşayır.
Bu təcavüz bir sıra sosial-nəqliyyat infrastrukturları ilə yanaşı, idman qurğularına da ziyan vurub. Rusların endirdiyi raket zərbələri “Desna”nın stadionunu tanınmaz hala salıb.
Ukrayna premyer-liqasında Çerniqov şəhərini təmsil edən “Desna”nın “instaqram” səhifəsində paylaşılan şəkillərdə arenanın raketlə vurulduğu görünür:
“Moskvadan olan işğalçılar növbəti dəfə şəhərimizdəki ən təhlükəli hərbi infrastrukturu - klubumuzun stadionunu atəşə məruz qoyublar. Şəkillərdə gecə baş verən bombardımanın nəticələrini görürsüz”.
Hücum zamanı stadionun giriş qapıları, tribunalardakı bəzi sektorlar, paltardəyişmə otaqları, ofis dağılıb, əsas meydan, həmçinin yardımçı meydançalar tam yararsız hala düşüb.
Xatırladaq ki, “Desna” bu stadionda sonuncu oyununu 2021-ci il dekabrın 5-də premyer-liqada “Mariupol”a qarşı keçirib. Ukraynanın qadınlardan ibarət milli komandasının Macarıstanla rəsmi oyunu 14150 tamaşaçı tutumu olan arenaya təyin edilmişdi. Əlavə edək ki, “Desna” hazırda müharibəyə görə dayandırılan Ukrayna çempionatında 16 iştirakçı arasında 7-ci yeri tutur.
Rusiya ordusunun top atəşi nəticəsində daha bir futbolçu həlak olub. “Atletik”in 16 yaşlı oyunçusu Dmitri Yevdoçenko dünyasını dəyişib.
Yeniyetmə futbolçu ilə birlikdə olan anası Mariya da ölüb. Onlar Kiyev vilayətinin Brovarski rayonundan təxliyə zamanı atəşə tutulublar. Xatırladaq ki, daha əvvəl sambo üzrə Ukrayna çempionu Artyom Priymenko ailəsi ilə birlikdə rus qoşunlarının Sumı şəhərindəki yaşayış binalarına aviazərbələr endirməsi nəticəsində həlak olub. Kikboksinq üzrə Ukrayna çempionu və Dünya Kubokunun gümüş mükafatçısı Yevgeni Zvonyuk Çerniqov şəhərindəki atışma nəticəsində dünyasını dəyişib. “Şaxtyor”un futbol akademiyasının adı açıqlanmayan məşqçisi rusların atdığı mərminin qəlpəsinə tuş gələrək həlak olub. “Karpatı”nın futbolçusu Vitali Sapilo Rusiya qoşunları ilə döyüş zamanı ölüb. Həmçinin “Qostomel”in 25 yaşlı futbolçusu Dmitri Martinenko Rusiyanın bombardmanı nəticəsində evində anası ilə birlikdə həlak olub.
Bu arada BBC “Reyncers”in Ukraynaya yardım edəcəyi haqda xəbər yayıb. Şotlandiya klubunun rəhbərliyi, məşqçiləri və futbolçuları mart ayının maaşının bir hissəsəni – ümumilikdə 72 min funt sterlinqi müharibədən zərər çəkənlərə ayırıb. Bundan başqa, klubun xeyriyyə fondundan əlavə olaraq 15 min funt sterlinq yardım ediləcək. “Reyncers”in baş məşqçisi Covanni van Bronkhorst bununla bağlı belə deyib:
“Münaqişə adamlara böyük zərbə vurur. Onlar yaxınlarını itirir, evlərindən qaçaraq təhlükəsiz yerlərə köçürlər. Ümik edirik ki, mart ayı üçün maaşlarımızın bir hissəsini onlara ayırmaqla bu günahsız adamlara yardım məqsədi ilə görülən işlərdə az da olsa, rol oynaya biləcəyik”.
Yeri gəlmişkən, “Real” rəhbərliyinin təqdirəlayiq addımını da nəzərinizə çatdıraq. İspaniya nəhəngi Ukraynadan olan qaçqınlara kömək məqsədilə martın 5-də klubun fondunun start verdiyi “Hər şey Ukrayna üçün” kampaniyasına dəstək məqsədilə 1 milyon avro bağışlayıb. Klubun rəsmi saytının məlumatında vəsaitin Qızıl Xaç Cəmiyyətinə və “Real Madrid Fondu”nun əməkdaşlıq etdiyi digər təşkilatlara göndəriləcəyi qeyd olunub.
Digər xəbərlər
