“Komanda yoldaşım zədələndiyi halda, gülə-gülə isinmə hərəkətləri edə bilmərəm” - Kamal Bayramov
Premyer-liqanın 19-cu turunda, “Səbail” – “Keşlə” duelinin ikinci hissəsindəki bir epizodda Stanislav Namaşko zədələndi.
Bunu görən Sənan Qurbanov Kamal Bayramova isinmə hərəkətləri etməyi tapşırdı. Lakin həkimlər Namaşkonun ciddi probleminin olmadığını bildirdi. Bundan sonra Kamal əsəbi halda yerində əyləşdi. Görəsən, onun belə aqressiv davranmasına səbəb nə olub? Təcrübəli qolkiper meydana daxil olub qələbədə pay sahibi olmaq istəyidi? Bayramovu dinləyək:“Əvvəlcə onu deyim ki, hadisə baş verəndə Sənan Qurbanov mənə deməyib ki, dur, isinmə hərəkətləri et. Stanislavın zədələndiyini görüb, özüm buna qərar verdim. Əvvəlcə meydanın rəqibə aid hissəsinin yanında isinmə hərəkətini yerinə yetirirdim. Sonra 4-cü hakim Kamal Umudlu məni öz qapımızın arxasına göndərdi. Bu halların heç birində Sənan Qurbanov mənə nəsə deməyib. Bu qaydadı. Qapıçı zədələnərsə, ehtiyatda olan dərhal isinmə hərəkətlərinə başlamalıdı. Mən qapının arxasına yaxınlaşdım. Namaşkodan vəziyyətini soruşdum. O, ağrılarının olduğunu bildirdi. Mən də cavabında dedim ki, isinmə hərəkətlərini davam etdirirəm. Vəziyyətə uyğun özünü necə hiss etdiyini mənə xəbər verməsini xahiş etdim. Bu səbəbdən də isinmə hərəkətini dayandırmadım. Amma normalda bunu etməliydim. Sadəcə, elə başa düşüldü ki, mən orda aqressiv davranmışam. Üz cizgilərim belədi. Məni neçə ildi tanıyanlar bilir. Komanda yoldaşım zədələndiyi halda, gülə-gülə isinmə hərəkətləri edə bilmərəm. Ya da geri qayıdanda gülmək xasiyyətimdə yoxdu. Gördüyünüz normal halım idi. Heç bir problem yoxdu. İsinmə hərəkəti etmək işimdi. Meydanda olan qapıçı zədələnərkən baş məşqçinin ehtiyatdakına göstəriş verməsinə ehtiyac yoxdu. Belə hadisə baş verəndə mən və ya başqa biri avtomatik ayağa qalxıb, isinmə hərəkətini yerinə yetirməlidi. Yenə deyirəm, hansısa əsəbi davranış olmayıb. Bunu necə görmüsüz, özümə də maraqlıdı. Yəni düşündüyüz kimi nəsə olmayıb”.
İLKİN SULTANLI
Digər xəbərlər
