Premyer-liqa klublarının qırmızı top dərdi - AÇIQLAMALAR
Premyer-liqanın 19-cu turu çərçivəsində keçirilən “Qəbələ” – “Zirə” matçında başverənlərdən xəbərdarsız.
Bazar günü başlayan qarşılaşma 65-ci dəqiqədə güclü qar səbəbindən dayandırıldı və qalan hissəsi ertəsi gün oynanıldı. Görüşlə bağlı həm ekran qarşısında əyləşənlərin, həm də ümumilikdə futbol ictimaiyyətinin narazılığına səbəb olan məsələ belə matçlar üçün nəzərdə tutulan qırmızı topdan istifadə edilməməsi idi. Təbii ki, qarlı havada topun daha aydın görünməsi üçün bu üsuldan yararlanmaq lazım idi.
Nəzərinizə çatdıraq ki, klublara topları AFFA paylayır. Özü də havayı. Qurumun Mətbuat və İctimaiyyətlə Əlaqələr Departamentinin rəhbəri Firuz Abdullanın bu məsələ ilə bağlı mövqeyi belə oldu:
“AFFA elitada çıxış edən bütün klublara təmənnasız toplar verib. Premyer-liqa təmsilçilərinin maddi durumu nəzərə alındığından izafi xərcə yol verməsinlər deyə, bu addım atılır. Ancaq bu o demək deyil ki, klublarımız əllərini yanlarına salıb oturmalıdılar. Belə qarlı hava şəraitini nəzərə alıb, özləri heç olmasa, 5 ədəd qırmızı top alıb anbarlarında saxlaya bilərlər”.
Bu cavabdan da aydın oldu ki, AFFA klublara topları yardım məqsədi ilə paylayır. Qurumun onları qırmızı topla təmin etmək kimi bir öhdəliyi yoxdu. Bu açıqlamadan yola çıxaraq premyer-liqada çıxış edən klubların mətbuat xidmətləri ilə əlaqə saxladıq, qarlı hava şəraiti üçün nəzərdə tutulan qırmızı rəngli topların olub-olmadığını öyrənməyə qərar verdik. “Neftçi”, “Qarabağ”, “Sumqayıt”, “Sabah” və “Keşlə” qırmızı rəngdə topların anbarlarında olduğunu qeyd etdi. Hətta “kimyaçılar”ın bazasında nə az, nə çox - düz 20 belə top var. “Qəbələ”nin mətbuat xidmətinin rəhbəri Anar Hacıyev isə daha ətraflı danışdı:
“Çempionatda istifadə olunan, “Nike” firmasının istehsalı olan tam qırmızı və ya narıncı top yox idi. Özümüzdə olan qırmızı top başqa firmanın istehsalı olduğundan premyer-liqa matçında ondan istifadə edilə bilməz. Ancaq həmin gün oynanılan topun da üzərində qırmızı zolaqlar var ki, qarlı havada ondan istifadə etmək mümkündü”.
“Qəbələ” ilə yanaşı, “Zirə”nin də anbarında “Nike” istehsalı olan qırmızı top yoxdu. “Səbail”ə gəlincə, qəsəbə təmsilçisindən sualımıza dünən cavab almaq mümkün olmadı. Daha doğrusu, “qlobal problem”ə bu gün aydınlıq gətirəcəklərini söylədilər.
SƏNƏM FƏRHADOVA
Digər xəbərlər
