Yunanıstanda Turan Manafovun başına nələr gəlib? - ÖZÜ AÇIQLADI
Turan Manafov koronavirusdan sağalıb.
Qış "transfer pəncərəsi"ndə Volos "Olimpiakos"una keçən futbolçu bir müddət əvvəl koronavirusa yoluxmuşdu. Müdafiəçi karantində qalıb və iki oyuna çıxa bilməyib. Ondan öncə də bel ağrılarından əziyyət çəkdiyini və müalicə aldığını xəbər vermişdik. Durumu ilə maraqlanmaq üçün özü ilə əlaqə saxladıq:
"Artıq koronavirusdan sağalmışam, 2 gündü normal məşqlərə başlamışam. Bu gün komandanın oyunu var. Dəqiq bilmirəm, oynayacam, ya yox. Böyük ehtimalla çıxış etməyəcəm. Çünki 10 gündən çoxdu məşq etmirəm. Birdən-birə meydana çıxıb oynamağım da düz deyil. Məşqçi qərar verəcək. Mən istəyirəm ki, qayıdım meydana, oynayım. Belimin ağrıları da, demək olar, yoxdu. Amma müalicə o qədər ürəyimcə olmadı. Çünki bura kiçik şəhərdi. Müalicə üçün tam şərait yoxdu. Bir sözlə, şəraitə uyğun ediblər".
Turandan ümumi ab-havanı, Yunanıstanda keçən 2 ayını da soruşduq:
"Ab-hava yaxşıdı. Yunanıstan mədəniyyəti də, yeməkləri də fərqlidi. Dil problemi yaşayıram. Çünki burda ingilis dili elə də məşhur deyil. Az adam bilir. Komanda yoldaşlarımdan bəziləri ilə vaxt keçirirəm".
Turanla Yunanıstan və Azərbaycan çempionatlarının fərqlərindən də danışdıq:
"Çempionat bizimkindən üstün deyil. Hətta deyərdim ki, Azərbaycan premyer-liqası daha yaxşıdı. İstər stadion, istərsə də oyunçuların səviyyəsi baxımından ölkəmiz daha yaxşıdı. Temp baxımından belə Azərbaycan liqası üstündü. Hakimlər çox fit çalır, salxayır matçı. Üstün cəhəti odu ki, skautlar futbolçular ilə daha çox maraqlanır burda".
Turan sözlərinə Volos təmsilçisində məşqçinin dəyişdiyini də əlavə etdi:
"Yeni məşqçi gəlib komandaya. İki gündü burdadı. İlk oyunu bu gün olacaq. Adı Timos Kavakasdı. Əvvəl də bu komandada məşqçi olub. Əvvəlki məşqçimizin niyə ayrıldığını bilmirəm. Çünki mən karantində idim. Amma yerli saytlarda oxumuşdum ki, nəticələrin yaxşı olmamasına görədi".
GÜNAY VƏLİYEVA
Digər xəbərlər
