''Trabzonspor'' 28 turu arxada qalan Türkiyə çempionatında 67 xalla inamla liderliyini davam etdirir.

Bu, superliqada son 15 ilin ən yaxşı performansıdı. Bir komandanın 28 tura bundan çox xal yığmasına sonuncu dəfə 2005/06-da rast gəlinib. O vaxt 1-2-ci pillələri bölüşdürən ''Fənərbaxça'' ilə ''Qalatasaray'' hərəyə 68 xal toplamışdı.
Bu arada son 10 tura ən yaxın rəqibindən 15 xal öndə daxil olan qaradənizlilərin çempion olmaq üçün bundan sonra neçə xala ehtiyac duyduqları məlum olub. Komandanın 38 illik həsrətə son qoyması üçün qalan həftələrdə 15 xal toplaması kifayət edəcək.

''Trabzonspor'' ona çatmaq ehtimalı olan bütün komandalardan şəxsi oyunlarda üstün olduğu üçün 15 xal toplayacağı halda istəyinə çatacaq. Yəni Abdulla Avcının komandası növbəti 5 turda maksimum nəticə toplasa aprelin 17-də, yəni sona 5 tur qalmış çempionluğu rəsmiləşdirəcək. Bu, həm də superliqa tarixinin ən erkən çempionluğu olacaq. Hazırda bu baxımdan rekord ''Fənərbaxça''ya məxsusdu. İstanbul nəhəngi 18 komanda ilə oynanılan 2013/14-də 31-ci tura təsadüf edən aprelin 27-də çempionluğu rəsmiləşdirmişdi. Bu, həm də ''Fənər''in son çempionluğudu.