''Qalatasaray'' ilk qələbəni darmadağınla qazandı

Türkiyə çempionatında 2-ci tura Ərzurumda start verildi. İlk turda evdə debütant ''Çorum''la 2:2 bərabərə qalan son çempion 2-ci turda digər debütant ''Ərzurumspor''un qonağı oldu.

"Football-plus.az" xəbər verir ki, bu dəfə İstanbul nəhəngi əvvəldən sona qədər inamlı təsir bağışlayaraq rəqibinə heç bir şans vermədi. ''Qalatasaray'' Roland Şallai, Yunus Akgünün qolları və Viktor Osimhenin dublu sayəsində 4:0 üstün oldu. Beləliklə, ''Cim-Bom'' mövsümdə ilk qələbəsini qazanaraq xalını 4-ə yüksəltdi.

Hər iki turda dubl edən Osimhen mövsümə əla start verib. Türkiyə çempionatında iştirak etdiyi ardıcıl 14-cü oyunda məhsuldar hərəkətlə yadda qalan ulduz futbolçu 4 qolla bombardirlər yarışına başçılıq edir. O, son 25 ildə ilk iki turda 4 qol vuran ilk ''Qalatasaray''lıdı. 2001-də Mario Jardel iki tura 5 qol vurmuşdu.

''Sarı-qırmızılar'' Okan Burukun dönəmində debütantlara qarşı 26 oyunun cəmi 1-də uduzub (22 qələbə, 3 heç-heçə). ''Qalatasaray'' Türkiyə çempionatında ümumilikdə 163-cü dəfə ən azı 4 top fərqli qələbə qazandı və bu göstəricidə turnirin rekordçusudu. Bu qələbələrdən 18-i Okan Burukun dönəmində əldə olunub.