"Kəpəz"in maliyyə dayaqlarının gücləndirildiyi haqda ilkin xəbəri nəzərinizə çatdırmışıq. Məlum olduğu kimi, baş məşqçi Azər Bağırov futbolçulara sponsorun tapıldığı və bundan sonra hansısa maliyyə sıxıntılarının olmayacağı haqda müjdə verib.

Etibarlı mənbədən "Football-plus.az"a verilən məlumata görə, mövzuyla bağlı yeniliklər var.

Belə ki, Gəncə təmsilçisinin premyer-liqanı tərk etməsinə mane olmaq istəyən şəxslər ciddi maliyyə dəstəyi verməklə yanaşı, klubda köklü dəyişikliklər etməyi planlaşdırır. Onlar "Kəpəz"də öz idarəçilik sistemini yaratmaq niyyətindədilər. Gəncəyə yaxın kanallar vasitəsilə hər ay "sarı-göylər" üçün böyük məbləğlər ayıran, heç-heçə və qələbələr üçün pul mükafatları ödəməyi boynuna gətirən şəxslər kollektivin qış "transfer pəncərəsi"ndə xeyli güclənməsini təmin etməklə yanaşı, vəzifə bölgüsü də aparmaq istəyir.

Belə ki, icraçı direktor Cabir İbrahimov vəzifəsindən ayrılacaq. İdarə Heyətinin sədri İlqar Nadirinin isə başqa vəzifəyə təyinatı planlaşdırılır. Klubun bir nömrəli rəhbəri maliyyə dəstəyi göstərən iş adamının təyin edəcəyi şəxs olacaq. Yeni sistemdə baş məşqçi Azər Bağırovun olub-olmayacağı isə hələ bilinmir.

Qeyd olunan planların nə vaxt reallaşdırılacağı dəqiq deyil. Başqa sözlə, hər şey komandanın mövsümün ikinci yarısındakı nəticələrindən asılıdı.

Təbii ki, oxucularımız bizə bu sualı ünvanlaya bilər: söhbət kimdən gedir? Adını açıqlamadığınız iş adamı kimdi? Bu barədə onu deyə bilərik ki, proses birbaşa SOCAR-dan idarə olunur. Layihənin ilkin mərhələsi "sarı-göylər"in premyer-liqada qalmasını təmin etməkdi. İkinci mərhələdə gəncəli azarkeşləri başdan-ayağa yenilənmiş və avrokuboklar uğrunda mübarizə aparan "Kəpəz" gözləyir. Özü də Gəncə şəhər stadionunda...

KƏNAN BAHADIR