“Beşiktaş”la bağlı mühüm bir transfer xəbəri yayılıb.

"Football-plus.az" xəbər verir ki, Sərgən Yalçının tələbi ilə yarımmüdafiənin mərkəzini gücləndirmək istəyən İstanbul nəhəngi Dortmund “Borussiya”sının və Türkiyə yığmasının üzvü Salih Özcanla ilkin razılıq əldə edib. Bu xəbəri “Sözcü” nəşri paylaşıb.

“Borussiya”da, demək olar, oynamayan və Türkiyəyə gəlməklə karyerasında yeni səhifə açmaq istəyən təcrübəli futbolçu son dönəmlərdə həm “Beşiktaş”ın, həm də “Qalatasaray”ın maraq dairəsində idi. “Borussiya” özü də onunla vidalaşmağın əleyhinə deyil. Çünki Salihin müqavilə müddəti mövsümün sonunda başa çatır. “Arılar” qışda bu satışdan müəyyən gəlir əldə etmək istəyir. Maraqlıdı ki, “Sözcü”nün iddiasına görə bu transfer “ağ-qaralar”a 3 milyon avroya başa gələcək. Bu məbləğ bir qədər yüksək görünür. Çünki Salihin “transfermarkt”da dəyəri zatən 3,5 milyon avrodu. 6 aydan sonra sərbəst statusa keçəcək bir futbolçuya görə bu boyda pul ödəməyə dəyərmi? Görünür, “Qalatasaray”ın da bu işin içində olması 27 yaşlı futbolçunun dəyərini artırıb. Köln şəhərində doğulan və eyniadlı klubun yetirməsi olan Salih Özcan “Holştayn”da da top qovub və 2022-dən “Borussiya”ya məxsusdu.

Ötən mövsümün ilk dövrəsini icarə əsasında “Volfsburq”da keçirən bu futbolçu cari mövsüm “Borussiya”da cəmi 4 rəsmi oyunda forma geyib. Salih Özcan ötən ay DÇ-2026-nın seçmə mərhələsində İspaniya ilə səfər oyununda (2:2) Türkiyə yığmasının heyətində ilk qolunu vurmuşdu.

“Beşiktaş”la bağlı daha bir vacib son dəqiqə xəbərini diqqətinizə çatdıraq. Məşqçilər korpusunun qərarı ilə iki futbolçu – Mərt Günok və Nəcip Uysal əsas komandadan kənarlaşdırılıb!

Maraqlıdı ki, hər iki futbolçu mövsümə kapitan statusunda başlamış, amma sonradan onların kapitanlığı əlindən alınmışdı. Nəcip klubda 17-ci, Mərt isə 4-cü mövsümünü keçirir.