Yay təlim-məşq toplanışı çərçivəsində ikinci yoxlama oyununu keçirən “Sabah” “Ferentsvaroş”la heç-heçə etdi – 1:1. Yeni mövsümdə Avstriyanın Tirol bölgəsində hazırlaşan “bayquşlar”ın macarlara qarşı tər tökən heyətində Qodfrey Boakye və Cafet Bulus Dunqusu gördük. Hətta Masazır təmsilçisinin yeganə qolunun müəllifi Dunqus oldu.

“Football-plus.az”ın məlumatına görə, adı çəkilən futbolçular son çempionun əvəzedici heyətində çıxış edir. Həm Boakye, həm də Dunqus Adino Mustedanagiçin rəhbərliyi altında meydana çıxan komandanın aparıcı simalarındandı. Görünür, onların bundan sonra əsas heyətdə şans qazanmaq ehtimalı yetərincə böyükdü. Hər halda, hər şey futbolçuların çıxışından asılı olacaq.

Maraq üçün qeyd edək ki, Boakyenin 20 yaşı var. O, mərkəz müdafiəçisidi. Müqavilə ilə “Birmingem”in U-21 komandasına məxsus olan belçikalı ötən ilin yayından icarə əsasında “bayquşlar”ın şərəfini qoruyur. Dunqusun isə 19 yaşı var. Nigeriyalı bu ilin yanvarından “Sabah”da çıxış edir. Müdafiəçi “bayquşlar”ın heyətində UEFA Gənclər Liqasında da top qovub.

KƏNAN BAHADIR