Emin Mahmudovun “Neftçi” ilə müqaviləsinin müddəti iyunun 30-da başa çatır. Çox güman, klubdan yeni təklif alacaq. Üç mövsüm əvvəl qat-qat artıq məbləğdə müqaviləyə imza atan 34 yaşlı kapitanın bu dəfə hansı şərtlərə razılaşacağını demək çətindi.
Amma Eminin qəlbində “Neftçi” sevgisi var. Hətta karyerasını bu komandada bitirmək istəyir. Bəs Mahmudov “Neftçi”yə lazımdımı? Birmənalı şəkildə bəli. Bu mövsüm çempionatda ən çox qol vuran yerli futbolçudu. 11 qol vuran Emin 7 məhsuldar ötürmə də verib. Yuri Vernidubun gəlişindən sonra “ikinci baharını yaşayır”. Amma bu heç nəyi dəyişmir. Emin müəyyən mənada əhval-ruhiyyə oyunçusudu. Kritik anlarda gücünü, sözünü ortaya qoya bilmir. Sakit təbiətli insandı. “Forza Neftçi” də buna görə Emindən narazılığını dilə gətirib.
Yəqin ki, Emin “Neftçi”də qalacaq. Ona “1+1 illik” müqavilə təklif edilməsi ən real variantdı. Təbii ki, maaşının azaldılması şərti ilə.
MÜZƏFFƏR QULUZADƏ