“Onu bildirim ki, Cəlalın “Petrolul”a keçidinə mən kömək etdim. Klub onu uzun müddət idi izləyirdi. Cəlalla danışdım, Azərbaycana qayıtmaq variantı da var idi, ancaq israrla legioner həyatı yaşamağa davam etmək istədiyini bildirdi. İndi Cəlal özünü orda yaxşı tərəfdən göstərməlidi ki, “Petrolul” başqa azərbaycanlı futbolçularla da maraqlansın. Bu gün premyer-liqamızda potensiallı gənclərin sayı az deyil. Mən bir çox xarici klubların rəhbərləriylə danışıram, daim əlaqədəyəm ki, futbolçuların transferində pay sahibi olum. Ancaq bir çox məqam var ki, hamısını nəzərə almalıyıq. Etiraf edim ki, bəzi yerli futbolçular daha çox xarici ölkədə oynamağa önəm verir. Elə Vüsal da bu sıradadı. Düzdü, bunda legioner limitinin də rolu var. Amma başqa ölkələrdə də dəyişikliklər olur. O vaxt serbiyalılar “Zirə”də 6 min dollar maaşa oynayırdılar. İndi Serbiyanın 1-ci liqa klubları futbolçularına 10 min avro məvacib verir. Odu ki, bu ölkədən Azərbaycana maksimum 3-4 futbolçu gələ bilər. Onlar da? təbii ki, “Qarabağ”, “Sabah” və “Neftçi”də oynayar. Bu gün braziliyalı futbolçu özünə rahatlıqla iş yeri tapa bilir. Lakin etiraf edək ki, azərbaycanlılara maraq azdı. Əlbəttə, futbolçunun xarakterindən də çox şey asılıdı. İndi əksər adamlar vətəndən uzaqda qalmaq istəmir. Məsələn, Bəhlulu qınayırlar ki, niyə Çindən gələn təklifi qəbul etmədi? Niyə etməliydi? Müntəzəm avrokubokların əsas mərhələsində çıxış edən “Qarabağ”da oynayır. Bu klubun futbolçular üçün yaratdığı şərait yetərincə yaxşıdı. Belə imkanlardan əl çəkib, Çinə gedəsi deyildi ki... Həmçinin, getsə, deyəcəkdilər ki, pula görə “Qarabağ”ı tərk elədi. Yəni ictimai fikir fərqlidi, hərə bir söz deyir. İndi futbolçular qaneedici variant axtarırlar. Yalnız daha yaxşı şərtlər olacağı halda, başqa ölkəyə üz tuturlar. Məsələn, Rüfət “Neftçi”də çox yaxşı maaş alacaq. Amma elə yerli oyunçular da var ki, maaşın məbləğinə fikir vermədən xarici ölkədə forma geymək istəyir. Ümumiyyətlə, Azərbaycanda Qurban Qurbanov, Valdas Dambrauskas, Yuri Vernidub kimi mütəxəssislər, “Qarabağ”, “Sabah”, “Neftçi” kimi yaxşı maliyyə imkanına malik klublar var. Təbii ki, əksər azərbaycanlılar məhz belə klublarda oynamaq, həm də ailəsinin yanında olmaq arzusundadı. Bununla belə, bu gün əsas göstərici milli komanda və avrokuboklardı. Görürük ki, orda olan futbolçulara maraq var. Başqa yerlərdə olanlar isə potensialı olsa da, təklif almır, klubunda oynamağa davam etməyə məcbur qalır. Öz aramızdı, Vaqif Cavadov o vaxt “Tvente”yə yox, yalnız “Rəvan”a qarşı oynasa, legioner həyatı yaşaya biləcəkdi? Təbii ki, yox. Ümumiyyətlə, bu gün bir çox yerli futbolçu xaricdə ortabab komandalarda oynaya, pul qazana bilər. Təbii ki, bunun üçün psixoloji baxımdan tam hazır vəziyyətdə olmalıdı. “Böyük beşlik” ölkələrində isə yalnız Elvin Cəfərquliyev çıxış edə bilər. Azərbaycanda Elvin qədər potensiallı ikinci futbolçu yoxdu”.