Klublarımızın ilk oyunu evdə keçirməsi sərfəli məqamdı? – menecer izah etdi
Məlum olduğu kimi, avrokuboklardakı təmsilçilərimiz ilk oyunlarını evdə keçirəcək. “Sabah” Çempionlar Liqasında iyulun 7-si və ya 8-də “Nyu Seynts”i, “Qarabağ” Avropa Liqasında iyuun 9-da “Vestri”ni, “Zirə” iyulun 9-da Konfrans Liqasında “Torpedo”nu, “Neftçi” iyulun 23-də Konfrans Liqasında “Dinamo-Minsk”/“Sileks” cütünün qalibini qəbul edəcək.
Bəs, komandaların ilk oyunlarını evdə keçirməsi lehimizə, yoxsa əleyhimizədi? Ümumiyyətlə, bu məqam nəticələrə nə dərəcədə təsir göstərə bilər?
Bu suallarla menecer Emil Şükürova müraciət etdik. Onun “Football-plus.az”a cavabı:
“İlk oyunun evdə keçirilməsi hansısa ziyan verməz. Bu gün daha çox qol vuran komanda növbəti mərhələyə adlayır. Daha matçın evdə, ya DA səfərdə keçirilməsinin prinsipial əhəmiyyəti yoxdu. Səfər qolu anlayışı da ləğv olunub. Burda yeganə problem azarekeşlərlə bağlı yaşana bilər. Çünki iki komandanın oyunu eyni günə düşsə, neytral tərəfdarlar seçim qarşısında qalacaq, hansı matça gedəcəklərini bilməyəcəklər. İnanıram ki, futbolsevərlərimiz klubları tək qoymayacaqlar”.
Emil bəydən rəqiblərin münasib olub-olmadığını da soruşduq:
“Düzü, futbolda zəif rəqib anlayışı yoxdu. DÇ-də də görürük ki, zəif saydığımız komandalar göstərdiyi oyunlarla sərfəli nəticələr qazanır. O başqa məsələ ki, kimsə favorit sayıla bilər. Ölkəmizdə çempionat “payız-yaz” sistemiylə keçirilir. Komandalar bu ərəfədə istirahət edir. Amma elə rəqiblər olur ki, onlarda yarış “yaz-payız” sistemiylə keçirilir. Bu üzdən daha yaxşı formada olurlar. Ancaq Bakının isti hava şəraitini də nəzərə almalıyıq. Bizimkilər bu cür şəraitə alışmış olur. Yəni bütün komandalar üçün həm sərfəli, həm də sərfəli olmayan məqamlar var”.
KƏNAN BAHADIR
Digər xəbərlər
