Dünya çempionatında səbirsizliklə oyununu gözlədiyimiz Türkiyə yığması debüt matçında fanatlarına əsl şok yaşatdı.

Qardaş ölkənin komandası aşkar favorit hesab olunduğu Avstraliya ilə oyunda qələbə bir yana heç qol da vura bilmədi. Kanadanın Vankuver şəhərində keçirilən oyunda Avstraliya 27-ci dəqiqədə Nestori İrankunda və 75-ci dəqiqədə Konnor Metkalfın qolları ilə 2:0 hesablı inamlı qələbə qazandı.

Vinçentso Montellanın komandasının 4 oyunluq qələbə və 8 oyunluq məğlubiyyətsiz seriyaları qırıldı. Türkiyə qapıya 30 zərbə endirdiyi halda 1 qol belə vura bilmədi. Bu, 2006-dan bu yana mundialda iştirak edən komandalar arasında ən pis göstəricidi. Sonuncu dəfə DÇ-2006-nın 1/4 finalında Portuqaliya İngiltərə ilə oyunda qapıya bundan daha çox (31) zərbə endirdiyi halda qol vura bilməmişdi. Hərçənd o matçda portuqaliyalılar penalti seriyasında üstün olmuşdular.

Ümumiyyətlə, Türkiyə üçün sanki nəhəng turnirlərin ilk oyunları lənətlənib. Türkiyə indiyə qədər 9 nəhəng turnirdə (AÇ, DÇ) iştirak edib və bunların 8-nə (!) məğlubiyyətlə başlayıb. ''Ay-ulduzlular'' yalnız AÇ-2024-də uduzmadan start veriblər. Komanda həmin turnirin ilk oyununda Gürcüstanı 3:1 məğlub edib.

Onu da bildirək ki, Türkiyə qrupda ikinci oyununu iyunun 20-də Bakı vaxtı ilə səhər saat 7-də Paraqvay ilə qarşılaşacaq.