Almaniyanın kişilərdən ibarət milli komandası özünü işə salıb.

Bundestim Millətlər Liqasının İngiltərə ilə oyununa (1:1) qadınlardan ibarət yığmanın forması ilə çıxıb.
Kişi futbolçular bu addımı milli komandanı qadınlar arasında keçiriləcək Avropa çempionatına dəstək məqsədi ilə atıblar. Futbol ləvazimatları üzrə ixtisaslaşmış “Footyheadlines” internet portalının məlumatına görə, bundestim bununla UEFA-nın əsasnaməsini pozub. Bu səbəbdən Almaniya Futbol İttifaqının (AFİ) cərimələnəcəyi gözlənilir. Məsələ burasındadı ki, qadın millisinin forması üzərində iki ulduz var. Bu, komandanın iki dəfə dünya çempionu olmasına işarədi. Kişilərdən ibarət yığma isə dörd dəfə dünya çempionu olduğundan onun forması üzərində dörd ulduz olmalıdı.

FİFA və UEFA-nın rəsmi forma qaydaları kişi və qadın komandalarının dünya çempionatında qələbə sayını göstərən ulduz mübadiləsini qadağan edir. Qeyd edək ki, kişilərdən ibarət komandanın forması üzərinə daha iki ulduz işarəsi əlavə edilsəydi, bu halda qaydalar çərçivəsində qadın yığmasının formasında oynaya bilərdi.