26-cı turun oyunu
Brentford – Arsenal 1:1
Lüis-Potter, 71 – Madueke, 61. (17224)
Arsenal: Rayya, Timber, Moskera, Qabriel, İnkapye (Kalafyori, 81), Eze (Edeqor, 46), Subimendi, Rays, Madueke (Saka, 70), Dyökereş, Trossar (Martinelli, 81).

Oyunun axarını nəzərə alsaq, əlimizi ürəyimizin üstünə qoyub deyə bilərik ki, 1 xal da “topçular” üçün qənimətdi. “Brentford”un qələbə qazanması ədalətli nəticə olacaqdı. Adətən, şən futbol oynayan meydan sahibləri bu dəfə müdafiədə intizamlı idi. Heç “Arsenal” da onları çətinə salmırdı.

"Football-plus.az" xəbər verir ki, ilk yarıda komandalar cəmi bir təhlükəli vəziyyət yaratdı, onda da Tyaqonun baş zərbəsindən sonra Rayya komandasını xilas etdi. 2-ci hissədə də “dişsiz” görünən qonaqlar sona yarım saat qalmış hesabı açdı. Uduzmaq fikrində olmayan “arılar” dərhal fəallığı artırdı. Qısa zaman kəsiyində üç təhlükəli vəziyyət yarandı. Lüis-Potterlə Tyaqoya hesabı bərabərləşdirmək üçün dəqiqlik çatmadı. Ancaq sona 19 dəqiqə qalmış aut “arılar”ın işinə yaradı. Lüis-Potter hesaba tarazlıq gətirəndən sonra da “Brentford” daha kəskin hücumlar qurdu.

Düzdü, final fiti ərəfəsində Martinelli “topçular”a üç xal qazandıra bilərdi, ancaq braziliyalı Kelleherlə təkbətək mübarizədə uduzdu. “Brenford” yetərincə ambisiyalıdı, avrokuboklara vəsiqə uğrunda mübarizəni davam etdirir. Arteta isə artıq bəzi məqamlarla bağlı daha dərindən düşünməlidi. “Mançester Siti” ilə xal fərqi cəmi 4-ə bərabərdi.