PSJ sanki Fransua Letesyeyə qənim kəsilib.

Paris nəhəngi ardıcıl iki mövsümdü finala yüksəldiyindən Letesyeyə ÇL-in şah oyununu idarə etmək qismət olmur. Halbuki bütün göstəricilərdə və səsvermələrdə fransalı iki ildi UEFA-nın ən yaxşı hakimidi.

Budəfəki final isə Daniel Zibertə həvalə olunub. 2015-ci ildən beynəlxalq oyunlara təyinat alan 42 yaşlı almaniyalı hakim üçün bu finalı karyerasının zirvə nöqtəsi saymaq olar. Çünki o, ümumiyyətlə, indiyə qədər UEFA-nın klub turnirlərində heç bir finalı idarə etməyib.

Zibert bu mövsüm ÇL-də 9 görüşə təyinat alıb. “Arsenal” 1/4 finalda “Sportinq” və yarımfinalda “Atletiko” üzərində qələbələri məhz bu hakimlə qazanıb. Ötən mövsüm “Mançester Yunayted”lə “Atletik” arasında AL-in yarımfinal matçında da fit sahibi olan Zibert AÇ-2024-də 2, AÇ-2020-də 3 görüşə təyinat alıb.

Maraqlıdı ki, 2017-də PSJ-nin “Barselona” önündə 1:6 fiaskoya uğradığı qarşılaşmada Zibert 4-cü hakim idi...