Daha bir azərbaycanlı futbolçu karyerasının zirvə nöqtəsində yanlış addım atdı. Söhbət cəmi 25 yaşında Türkiyənin elitasını yox, aşağı dəstəsini seçən Toral Bayramovdan gedir. Son mövsümdə komandasının əsas heyət üzvü olmasa da, ən azı bundan sonra ola bilərdi. Çünki rəqabətdə uduzduğu Elvin Cəfərquliyev əsas heyətdən uzaqlaşdırılıb və dönəcəyi də gözlənilmir.

Belə durumda Toral “Bursaspor”u seçdi. Qışda, ya da ötən mövsümün əvvəlində “Qarabağ”dan ayrılsaydı, anlamaq olardı. Amma Türkiyənin 2-ci liqasından 1-ci liqasına yenicə yüksəlmiş komandaya getmək Bayramov üçün geriyə atılmış addımdı.
Bir daha vurğulayaq: onun cəmi 25 yaşı var. Elə bu yay “Qarabağ”ın avrokubok oyunlarında özünü göstərib, daha səviyyəli komandalara keçə bilərdi. Onun yeri Türkiyənin elitasının debütantıdımı?

Türkiyə klubları, xüsusən də aşağı dəstələrdə çıxış edənlər daim maliyyə problemi içində olur. Elə bizimkilər də eyni aqibəti yaşayıb. Şahruddin Məhəmmədəliyev hələ də “Adana Dəmirspor”dan pulunu almayıb. Namik Ələskərovun karyerasını isə elə “Bursaspor” məhv etdi. Azərbaycanda çempion və bombardir oldu, Çempionlar Liqasında oynamaq şansı qazandı, amma “Neftçi”ni atıb getdi, tale də əvəzini verdi.
Düzdü, Namikdən fərqli Toral “Qarabağ”dan mehribancasına ayrıldı, klubuna ən azı milyon manat qazanırdı, iki ölkədə onun şəninə videoçarxlar hazırlandı. Təki karyerası parlaq olsun, məni yanıltsın. Ancaq bu sevdadan qətiyyən gözüm su içmir!
MÜZƏFFƏR QULUZADƏ