“Qarabağ”ın iki yüksək səviyyəli sol cinah müdafiəçisi var ki, hansının ən yaxşı olduğunu demək çətindi. Söhbət Toral Bayramovla Elvin Cəfərquliyevdən gedir.

Hər halda, “Futbol+”in “2024-cü ilin ən yaxşı futbolçusu” nominasiyası üzrə sorğusunun qalibi Toral oldu. İkinci pillədə, gözlənildiyi kimi, Elvin qərarlaşdı. Hadisələrin indiyəqədərki axarıyla işimiz yox. Hər iki oyunçu öz mövqeyi üzrə yaxşı performans sərgilədikləri üçün təqdir edilməyə layiqdi. Lakin məni son günlər narahat etməyə başlayan məqamdan bəhs etmək istəyirəm. Düzü, qış “transfer pəncərəsi” bağlanana qədər düşünürdüm ki, Toral ona gələn yağlı təkliflərdən birini qəbul edib legioner həyatı yaşamağa başlayacaq.

Olmadı... Niyə? Maraqlıdı...

Təəssüf ki, Qurban Qurbanov Avropa Liqasının əsas mərhələsində ona cəmi üç matçda start heyətində şans verdi. Elə Çempionlar Liqasının təsnifat mərhələsi üçün də həmin sayda oyunda ilk “onbirlik”də idi. Nə olsun ki, premyer-liqada geridə qalan 22 turda 16 dəfə start heyətində meydana çıxıb? Bunu Toral üçün xüsusi uğur saymaq, hansısa irəliləyişə nail olacağını düşünmək, təbii ki, məqsədəuyğun deyil. Ona görə ki, Toral ölkə səviyyəsində zirvəyə yüksəlməyi bacarıb. Bundan artıq nə etsin? 23 yaşlı sol cinah müdafiəçisi elita klublarının yarışında meydana çıxdığı 19 oyunda 5 qol, 6 məhsuldar ötümə müəllifi olursa, öz mövqeyindəki Elvini istər statistika, istərsə də xüsusi keyfiyyətlər baxımından qabaqlayırsa, ehtiyat oyunçular skamyasını daha yüksək səviyyəli çempionatlarda çıxış edən komandaların start heyətinə dəyişməlidi. Onsuz da həm Elvinin, həm də Toralın eyni komandada olması iki futbolçudan birinin daha az forma şansı qazanmasıyla nəticələnir.

Gecikmə, Toral, özünü də xilas et, Elvini də!

KƏNAN BAHADIR