Misli premyer-liqasının son turunda “Neftçi” “Kəpəz”i məğlub etdi - 1:0.

“Football-plus.az” xəbər verir ki, oyunsonrası mətbuat konfransında qonaqların baş məşqçisi Yuri Vernidub media önünə çıxıb.

- Komandada çox dəyişikliklər olacaq?
- Biz nə istədiksə, ona da layiq olduq. Müqavilə müddəti bitənlər var. Mövsüm başa çatandan sonra danışıqlar olacaq. Yüz faiz güclənməyə ehtiyac var. Klubun sahibləri var, onlar soruşacaq, mən də cavab verəcəm. Konfrans Liqasında və çempionatda yaxşı çıxış etməkdən ötrü güclənməyə ehtiyac var. Bu barədə sabahdan danışmağa başlayacağıq.

- Emil Balayevlə birgə 4 futbolçu milliyə çağrıldı. Gələn mövsüm komandanın əsas qapıçısı o olacaq?
- Emili təbrik edirəm. Son 5 oyunda yaxşı performans göstərib. Elə oynadı ki, milliyə də dəvət aldı. Bir nömrə olduğunu desəm, düzgün olmaz. Toplanışdan sonra bütün cavablar bəlli olacaq. Ciddi oyunlarımız üçün bir yox, üç qapıçımız var. Bu hal məni sevindirir.

- Yerli bazarda “göz qoyduğunuz” legionerlər var?
- Bəli, yaxşı legionerlər də, yerlilər də var. Daha çox yerli futbolçuya üstünlük verərdim ki, milli komandaya da töhfə olsun. Eyni mövqe üçün yerli və əcnəbi arasında qalsam, yerli futbolçunun lehinə olaram. Fərq çox deyilsə.

- Köklü dəyişikliklər etməyə zaman var?
- Nəsə demək çətindi. Hər futbolçunun öz arzusu var. Hər varianta hazır olmaq lazımdı.

- Azarkeşlər sizlə uzunmüddətli layihəyə çağırış edir. Buna hazırsız?
- Ən azı bir mövsümüm var. Məşqçi işi çətindi. Bu gün at üstündəsən, sabah düşə bilərsən. Əlimizdən gələni etməlisən. Belə təklif olsa, düşünərəm. Xalqı, insanları sevirəm, qonaqpərvərliyini bəyənirəm.

- Ukraynadan kənarda uzun müddət çalışmamısız. Bu təsadüfdü?
- “Metallurq”da uzun müddət çalışmışam. Sonra Belarusda, Moldovada işlədim. Ukraynada kifayət qədər məşqçi var. Qorxmadan deyirəm ki, “Neftçi” kimi böyük klubda çalışıram.

MÜZƏFFƏR QULUZADƏ