Misli premyer-liqasının 19-cu turunda “Neftçi” evdə “Qəbələ”ni məğlub etdi - 1:0.

Bakılıların baş məşqçisi Yuri Vernidub oyunsonrası mətbuat konfransında jurnalistlərin suallarını cavabladı.

- Komandanız ikinci hissədə niyə zəif oynadı?
- Daha yaxşı oyun gözləyirdik. Oyunçularıma dedim ki, bizə bu gün qələbə lazımdı. Onlar da buna nail oldular. Oyun yaddan çıxır, hesab isə yadda qalır.

- Mediada yazılanlara görə, “Qarabağ”la oyunun təxirə salınmamasını məhz siz istəmirsiz.
- Hansı mediada yazılıb? (gülür). Desələr oynayın, oynayacağıq. Desələr oynamayın, oynamayacayıq.

- Sizin üçün “Qarabağ”la oyun daha motivasiyalıdı?
- Azərbaycan çempionatında 12 komanda, 11 rəqibimiz var. Onların kimliyinin fərqi yoxdu - “Qarabağ", "Sumqayıt” və ya "Kəpəz". İstəyirəm ki, qələbə qazanaq.

- Əliyar Ağayevin idarəçiliyindən razı qaldız?
- Mənim şərh etməyim düzgün olmaz. AFFA Hakimlər Komitəsində şərh edilir. Səmimi deyim ki, bəzi qərarlarla razı deyiləm. Amma hakimlər də insandır. səhv edə bilər. Qərəzli yanaşma görmədim.

- Breno Almeyda haqda nə düşünürsüz?
- Uzun müddət idi onu izləyirik. Həm cinahlarda, həm də hücumun mərkəzində yaxşı çıxış edə bilər. 8 və 10 nömrə də oynaya bilir. Yaxşı driblinq texnikası və sürəti var. Mənim ondan gözləntilərim çox böyükdü. Sabahdan məşqlərə qoşulacaq. Kollektivə uyğunlaşması üçün vaxt lazımdı. Dərhal onu meydana buraxa bilmərəm. Tanış olmaq, məşqlərdə izləmək lazımdı.

MÜZƏFFƏR QULUZADƏ