Misli premyer-liqasında 33-cü turun hakim təyinatları bəllidi. Dörd gün ərzində keçirilən matçların baş hakimləri Kamranbəy Rəhimov, Rauf Cabbarov, Elvin Bayramov, Vüqar Həsənli, Əkbər Əhmədov və İnqilab Məmmədov olacaq.

Göründüyü kimi, bu siyahıda ölkəmizin fəaliyyətdə olan ən təcrübəli FİFA referisi Əliyar Ağayevin adı yoxdu. Ona VAR-da da ehtiyac duyulmayıb. Halbuki əvəzedicilər luqasının 25-ci turunda “Zirə-2” – “Sumqayıt-2”, 1-ci liqanın 26-cı turunda “Səbail” – “Şahdağ Qusar” matçlarında ədaləti təmsil etdiyindən premyer-liqada mövsümün son turunda şans qazanmaq ehtimalı böyük idi.

O başqa məsələ ki, Əliyar Ağayevin idarə etdiyi 1-ci liqa matçı Bayıl təmsilçisinin narazılığıyla nəticələnmişdi. “Dənizçilər”in baş məşqçisi Adil Şükürov 38-ci dəqiqədə hakimin qərarlarına etiraz etdiyinə görə sarı vərəqə almışdı.

Xatırladaq ki, Əliyar Ağayev ölkə kubokunun yarımfinalında keçirilən “Turan Tovuz” – “Zirə” matçında tovuzluların xeyrinə olan iki penaltini təyin etmədiyinə görə cəzalandırılıb.

KƏNAN BAHADIR