İngiltərə çempionatında böyük maraqla izlənilən çempionluq mübarizəsi başa çatdı. Premyer-liqanın 37-ci turunda ''Mançester Siti'' ''Bornmut''un qonağı oldu. ''Şəhərlilər''ə çempionluq şansını davam etdirmək üçün hökmən qələbə lazım idi. Amma komanda minimum hədəfin öhdəsindən gələ bilmədi. ''Bornmut''un gənc ulduzu Eli Junior Krupi fasilə ərəfəsində baxımlı zərbə ilə hesabı açdı. ''Siti'' yalnız son saniyələrdə Holannın qolu ilə məğlubiyyətdən qurtuldu. Qələbə qolu üçün vaxt qalmadı. Beləliklə, son tura 4 xallıq üstünlüklə daxil olan ''Arsenal'' 22 illik və ya daha dəqiq desək, 8059 günlük həsrətə son qoydu! London nəhəngi premyer-liqa dönəmində 4-cü tarixinin isə 14-cü çempionluğunu əldə etdi. Komanda bu göstəricidə yalnız hərəyə 20 çempionluğu olan ''Liverpul'' ilə ''Mançester Yunayted''dən geri qalır. ''Arsenal'' eyni zamanda London təmsilçilərinin 9 illik həsrətinə son qoydu. Bu şəhərin son çempionu 2016/17-də ''Çelsi'' olmuşdu. İlk çempionluğunu qazanan və məşqçi karyerasının 4-cü titulunu əldə edən Mikel Arteta adını premyer-liqa tarixinə yazdırdı. O, bu turnirdə həm futbolçu kimi oynamış, həm də məşqçi kimi çempion olmuş ilk futbol adamı oldu. Arteta futbolçu kimi ''Everton'' (2005-11) və ''Arsenal''da (2011-16) çıxış edib. 44 yaşlı Arteta premyer-liqanı qazanan ən gənc ikinci məşqçidi. Bu göstəricidə onu yalnız Joze Mourinyo (2005-də 42 yaşda, 2006-da 43 yaşda) üstələyib. Arteta həm də Xosep Qvardiolanın ardından premyer-liqanı qazanan ikinci ispaniyalı məşqçi oldu. Maraqlıdı ki, bu turnirin əsası qoyulandan, yəni 1992-dən bu yana heç bir ingiltərəli məşqçi çempion ola bilməyib. İngiltərə çempionatını qazanan son yerli mütəxəssis 1991/92-də ''Lids''in başında Hovard Uilkinson olub. Qvardioladan söz düşmüşkən, onu da bildirək ki, təcrübəli mütəxəssis acı bir ilkə imza atdı. O, məşqçi karyerasında ilk dəfə ardıcıl iki il çempion ola bilmədi! ''Mançester Siti'' son çempionluğunu 2023/24-də qazanıb.