Antonio Kontenin gələcək iş yeri müəyyənləşib. O, yenidən vətəni İtaliyada işləyəcək.

“Yuventus”, “İnter” və İtaliya yığmasının sabiq çalışdırıcısı “Napoli”yə başçılıq etməyə razılaşıb. Bu barədə İtaliya mənbələrinin yaydığı məlumata görə, 54 yaşlı mütəxəssis Neapol klubu ilə 3 illik müqavilə üzrə anlaşıb. Məlumatda Kontenin yeni iş yerində ilə 6,5 milyon avro maaş alacağı və “Napoli”nin transfer siyasətini qəbul etdiyi də bildirilib. Deyilənə görə, məşqçi yeni komandasının hazırkı heyəti ilə uğur qazanmasının mümkün olduğunu düşünür. Bu səbəbdən rəhbərliyin yay transfer əməliyyatları zamanı çox da fəallıq göstərməsinə ehtiyac duymur.

Xatırladaq ki, Kontenin sonuncu iş yeri “Tottenhem” olub. İngiltərə klubunu 2021-23-cü illərdə çalışdıran mütəxəssis bu ölkədə “Çelsi”nin baş məşqçi vəzifəsini də tutub və bu komandanı ölkə çempionluğuna daşıyıb. Ümumiyyətlə, Konte məşqçilik karyerası ərzində 8 titul qazanıb. O, bunlardan beşini “Yuventus”la, birini “İnter”lə, ikisini isə “Çelsi” ilə əldə edib.

Əlavə edək ki, "Napoli" hazırda İtaliya A Seriyasının turnir cədvəlində 8-ci yerdədi. Komanda 33 oyundan sonra 49 xal toplayıb.