“Real”ın mövsümü titulsuz başa vurması klub rəhbərliyinin fəaliyyətini sual altına alıb. Bu səbəbdən prezident və direktorlar şurası üçün erkən seçki keçiriləcək.

"Football-plus.az" xəbər verir ki, paytaxt klubunun saytının məlumatına görə, müvafiq komissiya seçki prosesinin başladığını elan edib.

Namizədliyin irəli sürülməsi üçün son tarix kimi mayın 23-ü müəyyənləşdirilib. Prezident vəzifəsinə birdən çox namizəd irəli sürülərsə, səsvermənin tarixi və yeri daha sonra elan ediləcək. Rəsmi məlumatda seçki qaydalarında müəyyən edilmiş tələb və şərtlərə uyğun olaraq poçtla səsvermənin də mümkünlüyü qeyd edilib.

Maraq üçün bildirək ki, əvvəllər seçki “Real”ın hazırkı prezidenti Florentino Peres tərəfindən təcili mətbuat konfransı zamanı elan olunurdu. İspaniyalı funksioner bu vəzifəni 2009-cu ildən, ondan əvvəl isə 2000-06-cı illərdə icra edib.