Mayın 7-də Avropa Liqasında (AL) yarımfinalın cavab oyunları keçirildi. İlk oyunlar ev sahiblərinin bir top fərqli qələbələri ilə yadda qalmışdı. Bu dəfə meydan sahibləri minimalhesablı məğlubiyyətlərin əvəzini artıqlaması ilə çıxdılar.

Bu mərhələdə İngiltərənin iki klubu arasındakı oyunların nəticəsi daha çox maraq doğururdu. Liqa mərhələsini mübarizəni 1/8 finalda dayandıran “Lion” ilə şərikli lider kimi başa vuran “Aston Villa” turnirin favoriti statusunu daşıyır. Amma Unay Emerinin komandasının AL-də ardıcıl 9 qələbəlik seriyası aprelin 30-da Nottingemdə qırılmışdı. Premyer-liqada çoxdan “Çempionlar Liqası zonası”nda möhkəmlənən birmingemliərin praktiki olaraq qitənin ən nüfuzlu klub turnirinə vəsiqəni təmin edəcəkləri ehtimal olunur. Onlardan fərqli olaraq “Nottingem Forest” ölkə çempionatında 2-ci diviziona düşməmək uğrunda yarışmasına baxmayaraq, evdə “Aston Villa”nı Vudun penalti ilə vurduğu yeganə qolla məğlub etməyi bacarmışdı. Vitor Pereyranın çalışdırdığı komanda AL-də yarımfinala qədər irəliləməklə Çempionlar Liqasına vəsiqə qazanmaq şansını da davam etdirirdi. Bunun üçün isə ilk növbədə İngiltərənin turnirdəki digər təmsilçisini mübarizədən kənarlaşdırmaq tələb olunurdu.

Lakin “meşəçilər” buna nail ola bilmədilər. Birmingemdəki həlledici matç ev sahiblərinin total üstünlüyü şəraitində keçdi. Yarımfinala qədər əsasən etibarlı müdafiəsi ilə seçilən “qırmızılar” Birmingemdə bu keyfiyyətlərindən istifadə edə bilmədilər. Həm hücumda, həm də müdafiədə ideal oyun sərgiləyən “Aston Villa” rəqibini 4 cavabsız qolla darmadağın etdi. Birmingemlilər 1982-ci ildən sonra ilk dəfə qitə kubokunun finalına vəsiqə qazandı. Xatırladaq ki, onlar 44 il əvvəl Çempionlar Kubokunun həlledici oyununda “Bavariya”ya 1:0 hesabıyla qalib gəlmişdilər. “Aston Villa” daha iki dəfə - 2001 və 2008-ci illərdə İntertoto Kubokunun qalibi olub. Lakin çoxdan “arxivə göndərilən” bu turnirdə bir deyil, bir neçə final matçı keçirilib. Diqqəti daha çox cəlb edən faktlar isə Emeri ilə bağlıdı. İspaniyalı mütəxəssisin çalışdırdığı komandalar AL-də 6-cı dəfə finala çıxdılar! Xatırladaq ki, 2014-16-cı illərdə “Sevilya”nı, 2021-ci ildə “Vilyarreal”ı turnirdə qələbəyə daşıyan Emerinin komandalarından yalnız “Arsenal” 2019-cu ildə həlledici matçda məğlub olub. Başqa sözlə, 54 yaşlı məşqçinin mayın 20-də İstanbulda keçiriləcək finalda 5-ci dəfə AL-in qalibi olmaq şansı var.

Onun komandasının rəqibi “Frayburq” olacaq. Almaniya klubu Portuqaliyada keçirilən ilk oyunda “Braqa”ya 1:2 hesabıyla uduzmuşdu. Yulian Şusterin komandası evdə bu məğlubiyyətin əvəzini artıqlamasıyla çıxdı. Tarixində ilk dəfə avrokubokun yarımfinalında oynayan “Frayburq”un uğuruna rəqibin üzun müddət azlıqda mübarizə aparması da şərait yaratdı. Braqadakı matçın son dəqiqələrində vurduğu qolla qələbədə rol oynayan Dorjeles Frayburqdakı cavab oyununun 7-ci dəqiqəsində Bestenin qarşısını kobudluqla aldığı üçün birbaşa qırmızı vərəqə ilə cəzalandı. İlk hissədə iki, fasilədən sonra bir qol vuran meydan sahibləri sonda 3:1 hesablı qələbə ilə finala adladılar. “Frayburq” tarixində ilk dəfə avrokubokun həlledici oyununda çıxış edəcək. Bunadək komandanın qitə arenasındakı ən yaxşı nəticəsi məhz AL-in 2022/23 və 2023/24 mövsümlərində 1/8 finala çıxması olub.

yarımfinal, cavab oyunları
Aston Villa (İngiltərə) - Nottingem Forest (İngiltərə) 4:0 (ilk oyun - 0:1)
Uotkins, 36. Buendiya, 58-p. Makqinn, 77; 80.
Aston Villa: E.Martines, Keş, Lindelöff (Boqard, 74), Konsa, Pau Torres (Minqs, 90), Din, Makqinn (Duqlas Luis, 90), Tilemans, Buendiya (Sanço, 86), Rocers (Beyli, 90), Uotkins.
Nottingem Forest: Orteqa, Kunya (Murillo, 88), Milenkoviç, Morato (Bakva, 71), N.Uilyams, Dominges, Hatçinson (Sinkler, 88), Anderson, Makeyti (Yeyts, 46), İqor Jezus, Vud (Lukka, 71).
Frayburq (Almaniya) - Braqa (Portuqaliya) 3:1 (1:2)
Kübler, 19; 72. Manzambi, 41 - Pau Viktor, 79.
Frayburq: Atubolu, Kübler (Makenqo, 80), Ginter, Linhart, Troy, Eqqeştayn, Manzambi, Höfler, Beste (Oqbus, 81), Qrifo (Höler, 90+1), Matanoviç.
Braqa: Qorniçek, V.Qomes, Karvalyo (Moskardo, 65), Oliveyra, Laqerbilke, Tıknaz (Q.Martines, 76), Qorbi, Moutinyo, Salasar (Navarro, 61), Dorjeles, Pau Viktor.

Bombardirlər: İqor Jezus (Nottingem Forest), Staniç (Ludoqorets) - 7, Aktürkoğlu (Fənərbaxça), Antoni (Betis) - 6.