Aprelin 30-da Avropa Liqasında (AL) yarımfinala start verildi. İlk oyunlar ev sahiblərinin bir top fərqli qələbələri ilə yadda qaldı.

Sözsüz, İngiltərənin iki klubu arasındakı oyun daha çox maraq doğururdu. Liqa mərhələsini mübarizəni 1/8 finalda dayandıran “Lion” ilə şərikli lider kimi başa vuran “Aston Villa” turnirin favorit statusunu daşıyır. Unay Emerinin komandası bunu AL-də ardıcıl 9 qələbə qazanan ilk İngiltərə təmsilçisi olmaqla doğrultmuşdu. Premyer-liqada çoxdan “Çempionlar Liqası zonası”nda möhkəmlənən birmingemliərin praktiki olaraq qitənin ən gəlirli klub turnirinə vəsiqəni təmin edəcəklərini proqnoz vermək olar. Onlardan fərqli olaraq “Nottingem Forest” ölkə çempionatında 2-ci diviziona düşməmək uğrunda yarışır. Buna baxmayaraq, Vitor Pereyranın çalışdırdığı komanda AL-də yoluna davam edir. Əvvəlki mərhələdə favoritlərdən sayılan “Portu” ilə gərgin mübarizədən qalib çıxan (1:1, 1:0) “meşəçilər” üçün ÇL-ə vəsiqə məhz AL-də qazanılacaq böyük qələbə ilə mümkün ola bilər. Bu səbəbdən evdə “Aston Villa”nı məğlub etmək “qırmızılar” üçün olduqca vacib idi. Maraqlı fakt kimi komandaların aprelin 12-də “Siti Qraund”da premyer-liqanın oyununda 1:1 hesabına razılaşdıqlarını da xatırladaq.

Onda ilk hissədə bir-birinin qapısına yol tapan britaniyalılar bu dəfə həmin stadionda fasiləyə qədər hesabı aça bilmədilər. Bunun əsas səbəbkarları isə qapıçılar oldular. Bu mənada Martinesi xüsusilə qeyd etməliyik. Argentinalı dünya çempionunun İqor Jezusun təhlükəli zərbəsinə reaksiyası inanılmaz oldu. İkinci hissənin əvvəlində isə Orteqa Uotkinsin sevinməsinə imkan vermədi. Nəhayət, 70-ci dəqiqədə müdafiəçi Din cərimə meydançasında topun qarşısını əli ilə aldı. Vud isə penaltini qola çevirmək şansını boşa vermədi. Qonaqların qalan vaxtda məğlubiyyətdən qaçmaq üçün etdikləri cəhdlər nəticəsiz qaldı. Çətinliklə də olsa istəklərinə çatan nottingemlilərin “Aston Villa”nın turnirdəki 9 oyunluq seriyasını qırdıqlarını xüsusi vurğulamalıyıq.

Portuqaliyada keçirilən digər oyun məhsuldar alındı. Maraqlıdı ki, yerli “Braqa” 1/4 finalda “Betis”i, “Frayburq” isə İspaniyanın digər təmsilçisi “Selta”nı mübarizədən kənarlaşdırmışdı. Tarixində ilk dəfə avrokubokun yarımfinalına vəsiqə qazanan “Frayburq” Braqadakı matçın 8-ci dəqiqəsində topu qapısında gördü: Qomesin ötürməsini Tıknaz qapının küncünə yönəltdi. Lakin bundan sonra ev sahiblərinin problemləri sıralanmağa başladı. Əvvəlcə rəqibə əks-hücum şansı verdilər və “Frayburq”un ən yaxşı bombardiri Qrifo bu komandada 108-ci qolunu vurdu. Hesab bərabərləşəndən bir neçə dəqiqə sonra “Braqa”nın kapitanı və lideri Rikardo Orta zədələnərək yerini Dorjelesə verməli oldu. Fasilə ərəfəsində Linhartın Laqerbilkeyə qarşı kobudluğuna görə təyin olunan penaltini Salasar qola çevirə bilmədi. Atubolunun seyvi qonaqlara ikinci hissəyə psixoloji cəhətdən rahat başlamaq imkanı yaratdı. Yulian Şusterin komandası fasilədən sonra böyük ölçüdə heç-heçə hesabını qorumağa çalışdı. Buna, demək olar ki, nail oldular. Lakin braqalıların qələbə istəyi qarşısında aciz qaldılar. Həlledici hissə boyunca qələbə əzmi nümayiş etdirən Karlos Visensin komandası son dəqiqələrdə Dorjelesin qolu ilə finala doğru vacib addım atdı.

yarımfinal, ilk oyunlar
Nottingem Forest (İngiltərə) - Aston Villa (İngiltərə) 1:0
Vud, 71-p.
Nottingem Forest: Orteqa, Ayna (Ebbott, 75), Milenkoviç, Morato, N.Uilyams, Dominges, Hatçinson, Anderson, Gibbs-Uayt, İqor Jezus (Yeyts, 90), Vud.
Aston Villa: Martines, Keş, Konsa, Pau Torres, Din (Maatsen, 78), Makqinn (Duqlas Luis, 78), Tilemans, Onana (Boqarde, 55), Rocers, Buendiya (Sanço, 78), Uotkins.

Braqa (Portuqaliya) - Frayburq (Almaniya) 2:1
Tıknaz, 8. Dorjeles, 90+2 – Qrifo, 16.
Braqa: Qorniçek, V.Qomes, Karvalyo, Oliveyra, Laqerbilke, Tıknaz, Qorbi, Moutinyo, Salasar (Navarro, 72), Rikardo Orta (Dorjeles, 25), Pau Viktor.
Frayburq: Atubolu, Troy, Ginter, Linhart, Makenqo, Eqqeştayn, Manzambi, Beste, Sudzuki (Höfler, 81), Qrifo (Şerhant, 81), Matanoviç.

Cavab oyunları mayın 7-də keçiriləcək.

Bombardirlər: İqor Jezus (Nottingem Forest), Staniç (Ludoqorets) - 7, Aktürkoğlu (Fənərbaxça), Antoni (Betis) - 6.