Aprelin 16-da Avropa Liqasında (AL) 1/4 finalın cavab oyunları keçirildi. Nəticədə mərhələni adlayan 4 komanda müəyyənləşdi.

"Football-plus.az" xəbər verir ki, liqa mərhələsini mübarizəni 1/8 finalda dayandıran “Lion” ilə şərikli lider kimi başa vuran “Aston Villa” favorit statusunu “Bolonya”nı səfərdə 3:1 hesabıyla məğlub etməklə doğrultmuşdu. Unay Emerinin komandasının AL-də ardıcıl 8 qələbə qazanan ilk İngiltərə təmsilçisi olduğunu da xatırladaq.

Gözlənildiyi kimi, birmingemlilərin turnirdəki qələbə seriyası 9 oyuna çatdı. İngiltərə klubu ilk hissədə 3:0 hesablı üstünlük əldə etməklə cütün qalibini böyük ölçüdə müəyyənləşdirdi. Hesabı açan Uotkins “Aston Villa”nın formasında 100-cü qolunu vurdu. Ona ötürmə verən Rocers 25-ci dəqiqədə penaltini qola çevirə bilməsə də, fasilə ərəfəsində hesab arasındakı fərqi üç topa çatdırdı. İtaliyada keçirilən ilk matçda hesabı açan müdafiəçi Konsa bu dəfə son nöqtəni qoydu – 4:0.

Premyer-liqanın digər klubu da turnirdə yoluna davam edir. Favoritlərdən sayılan “Portu” ilə səfər oyununda qənaətbəxş nəticəyə (1:1) nail olan “Nottingem Forest” evdə minimal hesabla qalib gəldi. Hazırda Portuqaliyada çempionluq uğrunda mübarizəni davam etdirən qonaqlar üçün İngiltərə səfəri çox ağır keçdi. 8-ci dəqiqədə müdafiəçi Bednarek rəqibin hücumçusu Vudun ayağına zərbə endirdiyi üçün birbaşa qırmızı vərəqə ilə cəzalandı. Çox keçmədən Gibbs-Uayt nottingemliləri hesabda önə keçirdi. Həlledici oyunu, demək olar ki, on nəfərlə keçirən “Portu” cavab qolunu vurmaq üçün bir neçə real imkan yaxalasa da, buna nail ola bilmədi.

İlk oyunlarda yeganə böyükhesablı qələbəni qazanan “Frayburq” əslində bu mövsüm turnirdə çox yaxşı təsir bağışlayan “Selta”nın qapısına İspaniyada da üç dəfə yol tapdı. Viqolular almaniyalılarla duellərdə yalnız təsəlli qolunu vura bildilər. “Frayburq” tarixində ilk dəfə avrokubokun yarımfinalına vəsiqə qazandı.

Bu mərhələdə diqqəti daha çox cəlb edən nəticə İspaniyanın hər iki təmsilçisinin mübarizəni dayandırması oldu. Portuqaliyada 1:1 hesabına nail olan “Betis” evdəki oyunun ilk hissəsinin ortalarına qədər ardıcıl iki qol vurarkən sevilyalıların yarımfinala adlayacağını düşünmək olardı. Lakin “Braqa” qalan vaxtda inanılmaz əzmkarlıq nümayiş etdirərək 4:2 hesablı qələbə qazandı.

1/4 final, cavab oyunları
Aston Villa (İngiltərə) - Bolonya (İtaliya) 4:0 (ilk oyun - 3:1)
Uotkins, 16. Buendiya, 26. Rocers, 39. Konsa, 89.
Aston Villa: Martines, Keş, Konsa, Pau Torres, Din, Makqinn (Beyli, 64), Tilemans (Duqlas Luis, 74), Onana (Boqarde, 78), Buendiya, Rocers (Sanço, 74), Uotkins (Abraham, 64).
Bolonya: Ravalya, Joao Mario (Zortea, 46), Kazale (Heggem, 82), Vitik, Miranda, Fröyler (Zom, 46), L.Ferqyuson, Moro, Bernardeski (Orsolini, 46), Rou, Kastro (Odqor, 76).

Nottingem Forest (İngiltərə) - Portu (Portuqaliya) 1:0 (1:1)
Gibbs-Uayt, 12.
Nottingem Forest: Orteqa, Ayna, Kunya, Murillo (Morato, 72), N.Uilyams, Ndoy (Milenkoviç, 65), İ.Sanqare, Gibbs-Uayt, Dominges, Hatçinson (Hadson-Odoi, 46/ Bakva,72), Vud (İqor Jezus, 16).
Portu: D.Koşta, A.Koşta (Froholdt, 46), Tyaqo Silva, Bednarek, Zaydu (Moura, 46), Fofana, Rosario, Veyqa (Kivyor, 46), Villiam Qomes, Moffi (Gül, 66), Sayns (Varela, 46).

Selta (İspaniya) - Frayburq (Almaniya) 1:3 (0:3)
Svedberq, 90+1 – Matanoviç, 35. Sudzuki, 39; 51.
Selta: Radu, Rueda (El-Abdellaui, 46), X.Rodriges, Laqo (Karreyra, 46), Alonso, Minqesa, Moriba (Svedberq, 46), Vesino (Alvares, 64), Cutqla, İqlesias (Aspas, 46), F.Lopes.
Frayburq: Atubolu, Troy, Ginter, Linhart (Oqbus, 71), Makenqo, Eqqeştayn, Manzambi (Höfler, 71), Beste (İrye, 83), Sudzuki, Qrifo (Şerhant, 56), Matanoviç (Höler, 56).

Betis (İspaniya) - Braqa (Portuqaliya) 2:4 (1:1)
Antoni, 13. Ezzalzuli, 26 - Pau Viktor, 38. Karvalyo, 49. Rikardo Orta, 53-p. Qorbi, 74.
Betis: Pau Lopes, Belyerin (Deossa, 77), Bartra, Lyorente, Rodriges (Qomes, 77), Amrabat, Fidalqo (Ruibal, 66), Fornals (Bakambyu, 77), Antoni (P.Qarsiya, 83), K.Ernandes, Ezzalzuli.
Braqa: Qorniçek, V.Qomes, Karvalyo (Oliveyra, 61), Laqerbilke, Arrey-Mbi (Moskardo, 20), Tıknaz (Navarro, 61), Qorbi, Rikardo Orta, Martines (Lelu, 80), Qrilliç, Pau Viktor (Moutinyo, 80).

İlk oyunları aprelin 30-da keçiriləcək yarımfinalda cütlər belə formalaşıb: Nottingem Forest - Aston Villa, Braqa – Frayburq.

Bombardirlər: İqor Jezus (Nottingem Forest), Staniç (Ludoqorets) - 7, Aktürkoğlu (Fənərbaxça), Antoni (Betis) - 6.