Ardıcıl 4-cü çempionluğunu qazanan ''Qalatasaray''ın çempionluq tədbirləri ilə bağlı planları bəlli olub.

Yayda dünya çempionatında iştirak edəcək ulduzlar yetərli qədər dincələ bilməyəcəklərini əsas gətirərək Okan Burukdan tətilə daha tez çıxmalarını xaiş ediblər. Çempionluğun rəsmiləşməsi ilə komandaya 4 günlük istirahət verən Buruk futbolçuların tələbini rəhbərliyə çatdırıb.

Türkiyə mətbuatının yazdığına inansaq, rəhbərliyin çempionluq kubokunun komandaya daha tez təqdim olunması ilə bağlı Türkiyə Futbol Federasiyasına müraciəti müsbət nəticələnib. Çempionluq tədbiri ya cümə axşamı, ya da cümə günü təşkil ediləcək. Ötən il ''Yenikapı''da baş tutan tədbirdə çoxlu sənətçi yer almış və şadyanalıq gecə saatlarında başa çatmışdı. Bu isə bir çox insanın narazılığına səbəb olmuşdu. Ona görə də rəhbərlik bu il heç bir sənətçini dəvət etməmək qərarına gəlib.

''Rams Park''dakı tədbirdə sadəcə lazer və fişəng effektləri, eləcə də DJ performansları olacaq. Mövsümlük abunə biletlər keçərli olmayacaq. Çempionluq tədbiri üçün xüsusi biletlər bu gün satışa buraxılacaq. Həmin gün futbolçular və məşqçilər korpusu üstüaçıq avtobusla yerli vaxtla saat 15.00-dan etibarən ''Qalatasaray'' litseyindən hərəkətə başlayacaq.

Stadiondakı tədbir saat 18.00-da başlayacaq. Futbolçular meydana saat 19.05-də ayaq basacaqlar və sonda federasiya rəsmiləri tərəfindən kubok təqdim olunacaq.

Çempionluq tədbirinin ardından demək olar, bütün əsas futbolçular tətilə yollanacaq. Yəni ''Qalatasaray'' son turda ''Kasımpaşa'' ilə səfər oyununa ikinci heyətlə çıxacaq.