Ferstappenin atası yaxşı qurtardı
Dördqat dünya çempionu Maks Ferstappenin atası, sabiq “Formula-1” pilotu Yos Ferstappen Belçikanın Valloniya əyalətində keçirilən rallidə ciddi qəza keçirib.
Qəza aprelin 26-da – yarışların son günündə baş verib. 54 yaşlı niderlandlının maşını döngədən çıxarkən trassdan kənara uçub və çevrilib. Maşına ciddi ziyan dəysə də, ekipaj qəzadan sağ-salamat qurtulub. Yos Ferstappen olayı belə şərh edib:
“Tozlu yolda çınqıl da var idi. Düşünürəm ki, biz döngəyə yüksək sürətlə daxil olduq, dirəyə dəydik. Məhz buna görə maşın çevrildi, damı üzərinə düşdü. Əsas odu ki, Yasper Vermülenlə birgə maşından sağ-salamat çıxdıq. Zərbə nə qədər güclü olsa da, təhlükəsiz maşındaydıq deyə, bizə nəsə olmadı”.
Xatırladaq ki, Maksın atası 1994-2003-cü illər aralığında “Formula-1” yarışlarında çıxış edib. 2022-ci ildən bəri isə ralli yarışlarına qatılır.
Digər xəbərlər
