Lionel Messi parlaq karyerasında daha bir rekordun müəllifi olub.

“İnter Mayami”nin hücumçusu növbəti dəfə komandasını qələbəsində böyük rol oynayıb. 38 yaşlı futbolçu “Toronto”ya qarşı oyunda (4:2) 1 qol vurub və 2 məhsuldar ötürmə edib. Messi MLS-in tarixində “qol+ötürmə” sisteminə görə 100-ə ən tez çatan oyunçu olub! Bunun üçün ona 64 oyun keçirmək kifayət edib. İndi Lionelin hesabında 59 qol, 41 məhsuldar ötürmə var.

Əvvəlki rekord “Toronto”nun sabiq oyunçusu Sebastyan Covinkoya (95 matçda 58 qol və 42 məhsuldar ötürmə) məxsus idi. Bu planda 3-cü yerin sahibi “Los Anceles Qalaksi”də oynamış Robbi Kindi. İrlandiyalı futbolçu 96 matçda 62 qol vurub və 39 məhsuldar ötürmə edib.