Lionel Messi möhtəşəm karyerasında daha bir unikal göstəricinin müəllifi olub. Canlı futbol əfsanəsi Ferents Puşkaşın tarixi rekordunu təkrarlayıb.

"Football-plus.az" xəbər verir ki, “İnter Mayami”nin ulduz futbolçusu bunu MLS-in 1/4 finalı çərçivəsində keçirilən “Sinsinnati” ilə matçda bacarıb. 38 yaşlı argentinalı komandasının 4:0 hesablı qələbəsi ilə başa çatan oyunda 1 qol vurub və 3 məhsuldar ötürmə verib. Nəticədə o, karyerası boyunca qol ötürmələrinin sayını 404-ə çatdırıb.

Bununla da Lionel macarıstanlı Puşkaşın göstəricisinə çatıb. Başqa sözlə, Messinin növbəti assisti onu yeni rekordun müəllifi edəcək.

DÇ-2022-nin qalibi artıq yeni rekordun yeganə müəllifidi. Söhbət Messinin 1300 məhsuldar hərəkətlə tarixi rekord müəyyənləşdirməsindən gedir!

İndi onun hesabında 896 qol və 404 ötürmə var. Lionel “Barselona”da 941, “İnter Mayami”də 117, PSJ-də 66, Argentina yığmasında isə 176 məhsuldar hərəkətlə yadda qalıb.

O, bu göstəricilərə ümumilikdə 1135 oyunda nail olub.