''Qalatasaray''ın növbəti çempionluğuna şahidlik etmək məcburiyyətində qalan ''Fənərbaxça''da hər yay olduğu kimi bu dəfə də heyətdə ciddi dəyişikliklər gözlənilir. İcarədə olan futbolçularla birlikdə ən azı 10 isimlə yollar ayrılacaq. Yeri gəlmişkən, artıq kluba lazım olmayan bir futbolçunun adı bəllidi. Bu, Edson Alvaresdi. Baş məşqçi səlahiyyətlərini icra edən Zəki Murat Gölə ''Konyaspor''la matçın ardından mətbuat konfransında ''Edsonla bağlı məşqçilər korpusu olaraq bir qərar verdik və bunu onun özünə də bildirdik'' açıqlamasını verdi. Həmin oyunun iştirak ərizəsinə salınmayan meksikalı futbolçu məşqçilərin qərarı ilə son turda ''Eyüpspor'' ilə oyunda da forma geyməyəcək. Bu da o deməkdi ki, Alvaresin ''Fənərbaxça'' karyerası artıq başa çatdı. Təcrübəli yarımmüdafiəçinin zatən klubda varlığı ilə yoxluğu bilinmirdi. ''Sarı-lacivərdlilər'' Meksika yığmasının üzvünü mövsümü əvvəlində 2 milyon avroya ''Vest Hem''dən icarəyə götürmüşdü. Yayda onu daimi əsasda transfer etmək istəyəcəyi təqdirdə ''Fənər'' ingilislərə daha 22 milyon avro ödəməli idi. Amma klub təbii ki, bu hüquqdan yararlanmayacaq və Alvaresi geri göndərəcək. Türkiyəyə uyğunlaşmaqda çətinlik çəkən bu futbolçu qarşıdakı dünya çempionatında iştirak edə bilmək üçün fevralda əməliyyat olunmağa qərar vermişdi. Alvares yalnız ötən həftə ''İstanbul BŞ'' ilə matçda geri dönərək son anlarda meydana çıxmışdı. Onun meydana ayaq basması fanatların ciddi fit sədaları ilə müşayiət olunmuşdu. Alvaresi əminliklə ''Fənər''in bu mövsümkü ən fiasko transferlərindən biri adlandırmaq olar. İllik 4,5 milyon avroluq maaşa rəğmən 28 yaşlı futbolçunun Türkiyə karyerası cəmi 18 rəsmi oyundan ibarət oldu. Ümumilikdə 1126 dəqiqə oynayan Alvares kluba cəmi 1 məhsuldar ötürməlik fayda verdi.