“Ötən mövsüm paralel şəkildə “Fənərbaxça”da işlədiyim üçün mənə çox çətin olmuşdu. Üzərimə ağır yük düşmüşdü və bura, demək olar, gələ bilməmişdim. Bu mövsüm bütün gücümü və konsentrasiyamı bura verdim. İlin ən azı 150 gününü Hallda keçirdim. Yakiroviç ötən mövsüm “Kayserispor”da gördüyü işlərlə diqqətimi çəkmişdi. Onu gətirməklə doğru qərar verdik. Yaxşı transferlər də həyata keçirdik. Hər kəs eyni hədəfə kökləndi və sonda istəyimizə çatdıq. Əslində mövsümün əvvəlində ekspertlər 23-cü yeri tutacağımızı iddia edirdilər. Amma mən komandamızın güclü və rəqabətədavamlı olduğunu bilirdim. Hərçənd mövsümü maksimum ilk “10-luq”da bitirəcəyimizi düşünürdüm. Bunu bacarsaydıq, artıq xoşbəxt olacaqdım. Amma Allah nəsib etdi. Türkiyədən, həmyerlilərimizdən də gözəl mesajlar alıram. Onların da dəstəyi məni sevindirir. “Hall Siti”ni artıq türk klubuna çevirmişik və bəlkə də premyer-liqaya yüksələcəyik. Yakiroviç bu komandaya ruh verdi, bu uğurda əsas pay sahibi məhz odu. Həm oyunçuları yeni səviyyəyə yüksəltdi, həm də əvvəlki məşqçilərin yararlanmadığı futbolçulardan yararlandı. Əlimizdə Makberni kimi qorxunc bir forvard var. Hər üç İstanbul nəhəngində rahat şəkildə oynaya biləcək səviyyədədi. Premyer-liqa səviyyəsində futbolçudu. Amma biz onu transfer etməyi bacardıq. Oyunu əla oxuyur və hər matçda meydanda bütün gücünü qoyur. Son matçdan öncə bizə qol vuracağına söz verdi və sözünün üstündə durdu. Növbəti rəqibimiz “Milluoll”du. Mövsümün əvvəlində məndən pley-offa vəsiqə qazanacağımız halda kiminlə qarşılaşmaq istədiyimizi soruşsaydılar, “Milluoll”un adını çəkərdim. Burda da qismət elə gətirdi ki, məhz onlarla düşdük. Bu mövsüm səfərdə onları 3:1 yenmişdiksə, öz meydanımızda onlar bizi eyni hesabla yenmişdi. Amma ev oyununda bir təmiz qolumuz sayılmamışdı. “Milluoll” maneəsini adlayacağımıza ürəkdən inanıram. Eyni birlik və inamla yolumuza davam etmık istəyirik. Premyer-liqaya vəsiqə qazanmaq təkcə “Hall Siti”nin özü üçün yox, bütün şəhər üçün mühüm əhəmiyyət daşıyır. Adətən, premyer-liqada təmsil olunan şəhərlər həmin mövsüm həm də liqanın mərkəzi sayılır. Bu da şəhərimizə müsbət mənada təsir edəcək”.