“Demək olar ki, oyunun taleyini qapıçılar həll etdi. Sergey Samokun buraxdığı ilk qolda mövqe səhvi var idi. “Canlı sədd”in qoruduğu tərəfə iki xırda addım atır və bu da səhv olmasına kifayət edir. Elə buraxılan qoldan sonra “Qarabağ” kimi komandaya qarşı mübarizə aparmaq çətinləşir, psixoloji təzyiq artır. Mateus Silvanın da uzaqdan vurduğu zərbəyə istənilən reaksiya verə bilmədi. Düzdü, səkmə də var idi, amma yenə də Samok topu dəf edə bilmədi. Ayxan Hüseynovun qolunda isə zərbə çox güclü idi. Fikir vermisizsə, top qapıya yaxınlaşarkən istiqamətini dəyişdi. Mateuş Koxalski zərbənin şiddətini nəzərə alab, daha sadə yanaşaraq iki əlindən istifadə edib, bloklaya bilərdi. Təəssüflə qeyd edirəm ki, hər iki qapıçı vurulan qollarda səhvlərlə yadda qaldı”.