“Mingəçevir”də yenidən xaoş başlayıb. Mövsümün gedişində əsas maliyyə dayağı sayılan ASTA-nın rəhbəri Adnan Əhmədzadənin həbsindən sonra klubda vəziyyətin yaxşı olmayacağı ilə bağlı xəbərlər dolaşırdı. Amma hər dəfə klubdan rəhbərlik səviyyəsində redaksiyamıza zəng gəlir, belə xəbərlər təkzib olunurdu.

Mövsümün sonuna doğru nəticələrdə qeyri-sabitlik müşahidə olunur. Son turda “Şahdağ Qusar”la üz-üzə gələn komandanın oyunçuları artıq məşqlərə çıxmaqdan imtina edir. Oyunla nəticə düz-mütənasib oldu – elita eşqində olan “Mingəçevir” dünən debütant “Şahdağ Qusar”a 0:2 uduzdu.

“Football-plus.az” məsələni araşdırdıqda məlum oldu ki, maaş almayan futbolçular var. Kütləvi şəkildə olmasa da. İştirak ərizəsində yer alan 25 futbolçudan ikisi hərbi xidmətdədi. 23 futbolçudan isə 9-10-u maaş almır. Daha doğrusu, vaxtından gec alır. Onların maaşının gecikməsi bütün komandada narazılığa səbəb olub.

Əldə etdiyimiz məlumata görə, fevralın maaşı tam ödənilib, mart üçün isə 10 futbolçunun maaşı hələ verilməyib. Futbolçuların pulunun gecikməsi isə məşqləri boykot etməyə səbəb olub.

“Mingəçevir” rəhbərliyi azarkeşlərini, ictimaiyyəti və ilk növbədə özünü aldatdı. Son turlara qədər “çempionluq, çempionluq” dedilər, sonra isə 2-ci olub, pley-off yolu ilə elitaya vəsiqə qazanmağı. Artıq “Səbail” bu hədəfə daha yaxın görünür. Rəhbərlik səviyyəsində də 2-ci yerə inam olduqca azalıb.

MÜZƏFFƏR QULUZADƏ