Türkiyəli ulduzlar Avropanın aparıcı çempionatlarına damğa vurmaqda davam edirlər.

"Football-plus.az" xəbər verir ki, daha öncə Arda Gülərin ''Elçe'' ilə oyunda 68 metr məsafədən vurduğu qol La Liqada martın ən yaxşı qolu seçilmişdi. Arda özü isə fanatların sorğusunda ''Real''ın apreldə ən yaxşı futbolçusu seçilmişdi. Türkiyə yığmasının kapitanı Hakan Çalhanoğlu da İtaliyada bu cəhətdən seçilməyi bacarıb.

Çempionluğu ötən həftə rəsmiləşdirən ''İnter'' aprelin əvvəllərində 31-ci turda evdə ''Roma''nı 5:2 hesabı ilə darmadağın etmişdi. Hakanın həmin qarşılaşmada uzaq məsafədən çox qüvvətli zərbə ilə vurduğu qol gündəm olmuşdu. Məhz həmin qol fanatlar arasında keçirilən sorğuda A seriyasında aprel ayının ən yaxşı qolu seçilib!

Bu mövsüm 30 qarşılaşmada aktivinə 12 qol, 7 məhsuldar ötürmə yazan təcrübəli futbolçunun hələ də ''İnter''də qalıb-qalmayacağı bilinmir. Uzun müddətdi, ''Qalatasaray''ın hədəfində olan 32 yaşlı yarımmüdafiəçinin Milan nəhəngi ilə 2027-nin yayına qədər müqaviləsi var.