Hacinin yığmaya növbəti gəlişi nə vəd edir? - “O deyirdi ki, pley-offu keçməsəm, xəstələnə və ölə bilərəm”
Rumıniya yığmasının vakant baş məşqçi postuna George Hacinin gətirildiyini xəbər vermişdik.
Xatırladaq ki, ona qədər yığmaya Mirça Luçesku rəhbərlik edirdi. Ancaq 80 yaşlı mütəxəssis aprelin 7-də dünyasını dəyişdi. Ölkə xaricində əsasən “Real”, “Breşia”, “Barselona” və “Qalatasaray”ın heyətindəki çıxışı ilə məşhurlaşan Hacinin məşqçi kimi son iş yeri “Farul” olub. 2021-25 aralığında çalışdırdığı Konstantsa təmsilçisini 2023-də Rumıniya çempionu edib. Ancaq ötən yay bu komanadan ayrılan “Karpat Maradonası” son 10 ayda işsiz idi.
Yerli futbol qurumunun bəyanatında belə deyilir:
“Rumıniya Futbol Federasiyası Rumıniya futbolunun ən parlaq təmsilçisinin baş məşqçi postuna təyinatını elan edir. Böyük uğurların rəmzi olan George Haci növbəti iki seçmə tsikl üçün müqavilə bağlayıb. Onun hədəfi milli komandanı dünya futbolunun elitasına qaytarmaqdı”.
Haci artıq bir dəfə yığmanı çalışdırıb: DÇ-2002-nin seçmə mərhələsinin sonunda “sükan arxasında” olub. Komanda qrupda onun rəhbərliyi altında keçirdiyi iki oyunda 4 xal toplamaqla pley-offa adlayıb, amma burda iki oyunun nəticəsinə görə Sloveniyaya 2:3 uduzub. Həmin uğursuzluğun ardından Haci postunu tərk edib.
Ardından mütəxəssis Türkiyənin “Bursaspor” və “Qalatasaray” klublarında, həmçinin vətənində - “Poli Timişoara”da çalışıb, ancaq heç bir yerdə 50 oyun həddinə çatmayıb.
“Vitorul”dakı iş dönəmi Haci üçün ən uğurlu olub: bu klubda 6 il keçirib, ölkə çempionluğunu, kuboku və Superkuboku qazanıb.
Əlbəttə, futbolçu Haci daha məşhur idi. Onun yolu “Qalatasaray”la yanaşı, “Barselona” və “Real”dan da keçib, Rumıniya yığmasında keçirdiyi 124 oyunda 35 qol vurub, ölkəsinin 20-ci əsr üçün ən yaxşı futbolçusu sayılıb.
Girişdə vurğuladığımız kimi, yığmanı Haciyə qədər Mirça Luçesku çalışdırırdı. O, komandanı DÇ-2026-nın seçmə turnirində pley-offa çıxarsa da, martın 26-da Türkiyəyə uduzdu – 0:1. Üç gün sonra növbəti məşq ərəfəsində Luçeskunun halı pisləşdi. Sonradan aydın oldu ki, mütəxəssis növbəti dəfə infarkt keçirib. Tezliklə çalışdırıcının vəziyyəti pisləşdi, həkimlər onu süni koma vəziyyətinə saldı. Ancaq Luçeni xilas etmək mümkün olmadı: aprelin 7-də gözlərini həyata əbədi yumdu. Yer aldığı xəstənanın press-relizi acı xəbəri dünyaya çatdırdı:
“Buxarest Universitet Xəstəxanası xəbər verir ki, bu gün, aprelin 7-də, 20.30 radələrində Mirça Luçesku öldü. Rumınların bütöv nəsilləri milli rəmz kimi ürəklərində onun obrazı ilə böyüyüblər. Allah onun qəlbinə rahatlıq versin”.
Haci müəlliminin, əfsanəvi mütəxəssisin ölümünü ağır keçirdi. Bu xəbər ictimaiyyətə açıqlanandan az sonra “TVR Info” telekanalına müsahibə verən “Karpat Maradonası” göz yaşlarını güclə saxladı:
“Mirça mənim üçün ata kimi idi. O deyirdi ki, pley-offu keçməsəm, xəstələnə və ölə bilərəm. Futbol onun üçün xəstəlik idi. Yeri cənnət olsun”.
Luçesku özü də Haci ilə birgə iş dönəmini xoş sözlərlə xatırlayırdı:
“Onu 17 yaşında yığmaya ilk dəfə mən götürdüm. 18 yaşında isə kapitan sarğısını verdim. Haci futbola ağlını itirmək dərəcəsində vurğun olan müstəsna peşəkardı. Düzdü, hansısa məqamda fiziki hazırlığa az diqqət yetirməyə başladı. Düşünürəm ki, məhz bu üzdən “Real”da çox davam gətimədi”.
İndi Hacinin üzərinə düşən əfsanəvi məşqçinin işini uğurla davam etdirməkdi.
Digər xəbərlər
