“Vensan Kompaniyə mənim haqda dediyi xoş sözlərə görə təşəkkür edirəm. Onun “Real”la oyunöncəsi mətbuat konfransıda dediyi sözlərin videosunu dərhal mənə göndərdilər. Onu uğurlu mövsüm keçirməsi və artıq bundesliqa çempionluğunu qazanması münasibətilə təbrik edirəm. Başqalarının özü haqda yox, sənin haqda danışdıqlarını eşitmək hər zaman xoşdu. Bu vəzifəyə gələndən sonra bir çox məşqçilərdən və futbolçulardan təbrik mesajları aldım. Düşünürəm ki, futbolda məşqçinin kişi və ya qadın olması prinsipial rol oynamamalıdı. Hər şey həmin şəxsin göstəridyi performans və əldə etdiyi nəticələr ilə bağlı olmalıdı. Bu təyinatdan sonra özümə qarşı bu boyda marağın olacağını gözləyirdimmi? Əslində buna hazır idim. İki il önə köməkçi vəzifəsinə təyin olunanda da eyni halla qarşılaşmışdım. Hərçənd yenə də ilk mətbuat konfransımda kameraların və mikrofonların sayı məni yaxşı mənada təəccübləndirdi. Ancaq sürpriz olmadı. Bilirdim ki, bu vəzifəyə gəlməklə müəyyən mənada cığır açmış olacam. Bir çoxları artıq mənə rol-model kimi baxacaq və bunun əhatə dairəsi getdikcə genişlənəcək. Ancaq mənim üçün ən önəmli şey meydanda yaşananlardı. Əsas işim futboldu. Məni bura komandaya qələbələr qazandırmaq üçün gətiriblər. Komanda şəklində mühüm işlər görmək, başqaları ilə ünsiyyət qurmağı bacarmaq həmişə məni özünə cəlb edib. Hərçənd söhbət açılmışkən, deməliyəm ki, bu təyinatımdan sonra kişi futbolunda qadın məşqçilərinin sayının artması heç də pis olmazdı. Burda hər kəs tərəfindən xoş qarşılandım. İlk işim futbolçuları bir araya toplayaraq əvvəlcə onları dinləmək, sonra ideyalarımı onlara aşılamaq oldu. İlk məşqdən sonra pozitiv enerji aldım və futbolçuların mənə güvəndiklərini hiss etdim. Son həftələr komanda üçün yaxşı keçməmişdi. Uğursuz nəticələrdən sonra oyunçuların özlərinə inamı azalmışdı. Ancaq onlarla ilk gündən aramızda səmimi münasibət yarandı. Mən öz ideyalarımı və komandaya aşılamaq istədiyim fəlsəfəni onlara danışdım. Zatən bu ideyaları “Volfsburq”la ilk oyunumzda da görmək olardı. Baxmayaraq ki, nəticə istədiyimiz kimi olmadı. Məğlubiyyət bizi üzsə də, düzgün istiqamətdə irəlilədiyimizi düşünürəm. İndi əsas məsələ həvəsdən düşməmək və növbəti oyuna hazırlaşmaqdı. Hər şeyin bir andaca yoluna düşəcəyini düşünmək düzgün deyil. Ancaq komandamın həm topla, həm də topsuz oyunu məni gələcəyə ümidlə baxmağa vadar etdi. O matçda fasilədən dərhal sonra ikinci qolu buraxmağımız çox pis oldu. Buna baxmayaraq, oyun intizamından qopmadıq və matçın qalan bölümündə bir çox fürsət yaxaladıq. Sadəcə, son nöqtəni qoymaqda çətinlik çəkirdik. Oyunu yaxşıca təhlil edərək pozitiv məqamların üzərində xüsusi dayandıq. Çünki məhz həmin məqamlara əsaslanaraq yolumuza davam etməliyik. Belə oynamağa davam etsək, əminəm ki, nəticələrimiz yaxşılaşacaq. Elitada qalacağımıza və lazımi qədər xallar toplayacağımıza şübhəm yoxdu. Oyunçular kifayət qədər peşəkardı və hər şey öz əlimizdədi. “Leyptsiq”ə qarşı, eləcə də digər oyunlarda xallar toplamağa çalışacağıq. Düzdü, müdafiə olunmaq, yığcam oynamaq və rəqibə təzyiq göstərmək çox vacibdi. Amma müdafiə ilə yanaşı, hücum etmək və qol vurmaq da lazımdı. Komandamın cəsur futbol oynamasını istəyirəm”.