Aprelin 13-də anteplilər “Çaykur Rizəspor”a 1:2 uduzandan sonra baş məşqçi Burak Yılmaz istefa vermişdi. Ötən tur “Kayserispor”la oyuna komanda Mustafa Aksoyun rəhbərliyi altında çıxmışdı.

"Football-plus.az" xəbər verir ki, rumıniyalı Marius Şumudikanın baş məşqçi postuna gətiriləcəyi ilə bağlı xəbərlər təsdiqini tapmayıb. “Qaziantep” rəhbərliyi ona yox, həmyerlisi Mirel Redoya üstünlük verib. 45 yaşlı mütəxəssis danışıqlar üçün hələ çərşənbə axşamı Antepə dəvət olunmuşdu. Tərəflər arasında aparılan danışıqlar uğurla yekunlaşdı və bu məşqçi ilə ilyarımlıq müqavilə imzalandı. Aprelin 22-də Redoy rəsmən klubun yeni məşqçisi kimi təqdim olundu.

Qeyd edək ki, Redoy daha öncə BƏƏ klublarında, Krayova “Universitatya”sında, eləcə də Rumıniya yığmasında çalışıb. O, son olaraq FKSB-nin başına keçmişdi. Özü də bu təyinat ötən ay, daha dəqiq desək, martın 10-da reallaşmışdı. Amma göründüyü kimi Redoy artıq “Qaziantep”in başındadı.

Bu klub Türkiyə çempionatında 30 tura topladığı 37 xalla 10-cu pillədə qərarlaşıb. Yeni məşqçinin debüt oyununda komanda sabah “Eyüpspor”un qonağı olacaq.