U-20-nin millimizin Qəbələdəki təlim-məşq toplanışı davam edir. AFFA-nın dəvəti ilə toplanışı bu gün media nümayəndələri də izləyib.

Məşqdən sonra U-20-nin baş məşqçisi Ruy Jorje jurnalistlərin önünə çıxıb.

- Toplanışı necə dəyərləndirirsiz?
- Keyfiyyətli məşqlər keçmişik. Oyunçulardan istədiyimiz reaksiyanı ala bilirik. İkihəftəlik təlim-məşq toplanışından razıyam.

- Toplanışa yoxlama oyununun salınmamasının səbəbi nədi?
- Oyunçuları daha yaxından tanımaq istəyirdim. İlk yoxlama oyunundan əvvəl hansı səviyyədə olduğumuzu bilmək lazımdı.

- Milli komanda ilə ilk tanışlığınızdı. Futbolçularla bağlı təəssüratınız necədi?
- Futbolçuların yanaşmasından razıyam. Çox istəklidilər və oyun fəlsəfəmizə uygun gəlirlər. Görürük ki, öyrənməyə, inkişaf etməyə can atırlar.

- Millidə hansı oyun fəlsəfəsini tətbiq edəcəksiz?
- Hazırda bunu demək çox çətindi. Sözsüz, hamı hücumameyilli oynamaq istəyər. Çalışacağıq ki, bu istiqamətdə gedək. Amma bunun üçün keyfiyyət lazımdı. Keyfiyyəti əldə etmək üçün çox məşq etməliyik.

- Qarşıdakı toplanışda yoxlama oyunları nəzərdə tutulub?
- Bəli, olacaq. Çox güman, başqa ölkənin milli komandasına qarşı oynayacağıq.

- Heyəti yığarkən yerli məşqçilərin fikrini öyrənmisiz, yoxsa öz seçimlərinizdi?
- Bu yaş kateqoriyasında bundan əvvəl milliyə dəvət olunmuş oyunçulardı. Son oyunları izləmişik.

- Sizdən əvvəl burda tanınmış əcnəbi məşqçilər çalışıb, amma heç biri uğur qazanmayıb. Artıq komanda ilə tanışsız. Şanslarınızı necə qiymətləndirirsiz?
- Keçmiş məşqçilər barədə danışmaq düzgün olmazdı. Bura oyunçuların keyfiyyətini artırmaq üçün gəlmişəm. Gələcəyə fokuslanmışam. Bunun üçün əlimdən gələni edəcəyəm. İnanıram, elə komanda olacaq ki, bütün ölkə onunla fəxr edəcək. Bu, mənim üçün çox vacibdi. Oyunların nəticəsi məşqlərin məntiqi sonluğu olmalıdı. Dünya çempionatına ev sahibi kimi qatılacağıq. Sözsüz, bizlə dünya çempionatına vəsiqə qazanacaq komandalar arasında böyük fərq var. Digər iştirakçılarla aramızdakı fərqi azaltmaq üçün işləməliyik.

- Qəbələdə şərait necədi?
- Çox razıyam. Bizim üçün əla şərait yaradılıb. Hara getsən, hər yerdə qonaqpərvər insanlarla rastlaşırsan. Dəstəyə görə hər kəsə təşəkkür edirəm.

MÜZƏFFƏR QULUZADƏ