Elitada qalmaq uğrunda mübarizə aparan “Qəbələ”nin işləri yolunda getmir.

“Qırmızı-qaralar” son 7 matçda qələbə qazana bilməyib. Belə uğursuzluğun fonunda “Kəpəz”in xal ehtiyatını artırmağa davam etməsi komandanın hələ uzun müddət 11-ci pillədə qalacağının göstəricisidi. Təbii ki, vəziyyət belədisə, klubun məsul şəxslərinə, komandaya gecə-gündüz çalışmaq, biz media nümayəndələrinə isə tənqid etmək qalır. Lakin hər şey bununla yekunlaşmır. Çünki futbolun ayrılmaz parçası olan azarkeşlər də var. Belə məqamda məhz həmin şəxslər – “Qəbələ”yə könüldən bağlı olan tərəfdarlar dəstəyini əsirgəməməlidi...

...Onlar nə edir? Nəinki oyunlarda, xüsusilə, səfər matçlarında tribunaları boş qoyur, həm də baş məşqçi Kaxaber Sxadadzeni istefaya səsləyirlər. Mütəxəssisin özünün də dediyi kimi, həmin şəxslərin əksəriyyəti 13-14 yaşlıdı. Buna Misli premyer-liqasının 25-ci turunda keçirilən “Turan Tovuz” – “Qəbələ” oyununda canlı şahilik etdim. “Red Black Army” fanklubunun azyaşlı üzvləri yalnız matçın ilk dəqiqələrində fəallıq göstərdi. Davul çalmaqla və müxtəlif şüarlarla komandaya dəstək olan tərəfdarlar tezliklə dayandı. İkinci hissədə, ümumiyyətlə, onların əyləşdiyi tribunadan səs-küy gəlmədi. Kəsəsi, komandanın 2:3 hesablı məğlubiyyətində baş məşqçi və futbolçular qədər onların da payı oldu!

Hər halda, bu məqamda tovuzlu azarkeşlərin əvvəldən sona qədər sevimli komandalarını dsətəklədiyini xatırlatmağa ehtiyac yoxdu. Buna qətiyyən şübhə etməyə dəyməz. Bəs, “Qəbələ” həmin dəstəyə layiq deyilmi? Həqiqətənmi “Qəbələ” artıq Qəbələdə sevilmir və qəbələlilərin könlündə yeri yoxdu?!

Mövsümün sonuna cəmi 8 tur qalıb. Əziz qəbələlilər, ya komandanı dəstəkləyin, ya da “istefa” şüarını bir qırağa qoyun. Bunlar yalnız ikisi bir arada olanda dəyər daşıyır. Başqa cür süni görünür. Dəstəyiniz kimi!

KƏNAN BAHADIR