FİFA iranlıları sevindirmədi
İran Futbol Federasiyası (İFF) FİFA-ya müraciət edib. Müraciətdə DÇ-2026-nın qrup mərhələsinin bəzi oyunlarının ABŞ-dən Meksikaya keçirilməsi xahiş olunub.
"Football-plus.az" xəbər verir ki, bu barədə İranın Meksikadakı səfirliyinin X sosial şəbəkəsində yaydığı məlumatda bildirilib. İFF-nin prezidenti Mehdi Tac belə deyib:
“Tramp açıq şəkildə bildirdi ki, İran milli komandasının təhlükəsizliyini təmin edə bilməyəcək. Biz ABŞ-yə getməyəcəyik. FİFA ilə dünya çempionatının oyunlarının Meksikada keçirilməsi barədə danışıqlar aparırıq”.
Turnir bu yay ilk dəfə üç ölkədə - ABŞ, Kanada və Meksikada təşkil ediriləcək. Təqvimə əsasən, İran yığması qrupdakı hər üç oyununu ABŞ ərazisində keçirməlidi. Bir neçə gün əvvəl İranın mundialda iştirakdan imtina etmək istədiyi açıqlanıb. Lakin Asiya Futbol Konfederasiyasının baş katibi Vindzor Con bazar ertəsi cənub qonşumuzun hələ də dünya çempionatında iştirak etməyi planlaşdırdığını bildirib.
Artıq FİFA İFF-nin milli komandanın oyunlarının keçiriləcəyi məkanlarla bağlı müraciətinə cavab verib.
Ali futbol qurumunun “The Athletic” nəşrinə danışan rəsmisi İFF-nin prezidenti Tacın oyunların ABŞ-dən Meksikaya köçürülməsi ilə bağlı danışıqlar aparıldığı barədə məlumatına münasibət bildirib. FİFA bütün üzv assosiasiyalarla, həmçinin İranla daimi təmasda olduqlarını, lakin bütün komandaların 2025-ci il dekabrın 6-da təsdiqlənmiş rəsmi cədvələ uyğun mübarizə aparacağını vurğulayıb. Bu isə o deməkdi ki, oyunların yerinin dəyişdirilməsi planlaşdırılmır.
Digər xəbərlər
