İrandan FİFA-ya qeyri-adi məktub ünvanlanıb.

Cənub qonşumuzda bir qrup futbolçu, futbol mütəxəssisi və başqa idman növləri üzrə çalışan şəxs futbol üzrə milli komandanın DÇ-2022-dən kənarlaşdırılması üçün ali təşkilata müraciət edib.

FİFA-ya ünvanlanan məktubda bildirilib ki, öz xalqına qarşı qəddarlıq nümayiş etdirən İranın milli komandası mundialda iştirak etməməlidi. Ölkədə qadınların stadionlara buraxılmadığını qeyd edən narazılar onların, ümumiyyətlə, futbol ekosistemindən müntəzəm kənarlaşdırıldığını bildiriblər. Bu isə FİFA-nın Nizamnaməsinin 3-cü və 4-cü maddələrinin (FİFA beynəlxalq səviyyədə müəyyən edilən insan hüquqlarına hörmət və onları müdafiə edir) və əsas prinsiplərinin pozulması deməkdi. Bir neçə fəaliyyətdə olan (Hüseyn Mahini, Aref Qolami) və sabiq futbolçunun (Əli Daei, Əli Kərimi) dövlət tərəfindən təqib və həbs olunduğu, hədə-qorxuya məruz qaldığı qeyd edilib. Məktubda İran Futbol Federasiyasının (İFF) bu kimi neqativ hallara uzun illərdi göz yumduğu və hökumətin verdiyi qərarları susqun qarşıladığı, başqa sözlə, İFF-nin müstəqil işləməyən təşkilat olduğu da vurğulanıb. Yerli hakim dairələrdən şikayətçi olanlar bununla FİFA-nın Nizamnaməsinin 19-cu maddəsinin pozulduğunu xatırladıblar.

Bunlara görə FİFA-nın İFF-nin bu quruma üzvlüyünü dərhal dayandırmalı olduğu məktubda qeyd edilib. Əvvəllər buna görə yaxın keçmişdə Küveyt və Hindistanın futbol qurumlarının, daha əvvəl isə İFF-nin ali qurumun üzvlüyündən kənarlaşdırıldığı da yada salınıb. İndiki halda FİFA Şurasının təcili sanksiyalara əl ata biləcəyi qeyd edilib.

DÇ-2022-nin startına təxminən bir ay qalır. İran millisi Qətərdə keçiriləcək turnirin qrup mərhələsində İngiltərə, ABŞ və Uels komandaları ilə mübarizə
aparacaq.