Şahın yığmada nə işi var? – “çağrılıb ki?”

Martın 20-də milli komandanın “FİFA Series” turniri üçün heyəti açıqlandı. Ən qəribə qərar isə qapıçı Şahruddin Məhəmmədəliyevin çağrılması oldu.

Şah sonuncu dəfə ötən ilin noyabrında Fransa millisinə qarşı 45 dəqiqə meydanda olub. Ondan bəri zədəlidi. Heç komanda ilə məşqlərə də qatılmır. “Kəpəz”lə oyundan sonra Qurban Qurbanova kiperin milliyə çağrılması ilə bağlı sual verildi və o hamının siyahını görərkən göstərdiyi reaksiyanı verdi: “çağrılıb ki?”

Maraqlıdı ki, qapıçıdan çox qapıçımız var. Ayxan Abbasov başqa mövqelərdə oynayan futbolçuların azlığından şikayət edirdi. Qapıçılar ki çoxdu. Məsələn, Tərlan Əhmədli hazırda Şahdan daha yaxşı formadadı. Son oyunda da komandasının ən yaxşısı idi. Yusif İmanov bir-iki oyunu çıxsaq, qeyri-sabit də olsa, oynayır, o belə Şahruddindən yaxşı vəziyyətdədi. 1-ci liqanın lideri “Şəfa”nın qapıçısı Əlirza Müştəbazadədə də 19 oyunda cəmi 13 qol buraxıb. O da mümkün variant kimi sınanıla bilərdi.

Niyə məhz zədəli, karyerası bitmiş Şahruddin?

MÜZƏFFƏR QULUZADƏ