Ayxan Abbasov millinin baş məşqçisi kimi ilk dəfə heyət açıqladı. Fernando Santuşun güvəndiyi heyətlə müqayisədə müəyyən fərqlər var. Abdulax Xaybulayevlə Rüstəm Əhmədzadəni nəzərdə tutmuruq. Ayxan bəy onları Ukrayna ilə oyuna da çağırmışdı.

Qapıçılar dəyişməyib. Santuşla Abbasov bu mövqe ilə bağlı eyni cür düşünür. Əslində qapıçılarla bağlı eksperiment yersiz olardı. Müdafiə xəttində bir yenilik Faiq Hacıyevin cağrılmasıdı. Açığı, bu da mənə qəribə gəldi. Faiq “Turan Tovuz”un kapitanı, əsas heyət üzvü olsa da, komandasında fərq yarada bilən, hansısa xüsusiyyətinə görə fərqlənə bilən müdafiəçi deyil. Rahil Məmmədov yenidən yığmadadı. “Araz-Naxçıvan”da sabit çıxış etməyə çalışan mərkəz müdafiəçisinə millidə ehtiyac var. Abbas Hüseynov yenə də çağrılıb. Ribeyronun yoxluğunda özünü ən yaxşı tərəfdən göstərən Murad Xaçayev də heyətdədi. Açığı, Murad özü də buna layiqdi. Ozan Can Kökcünü isə artıq çağırmayıb. Əslində Ozanın milli komandaya hansısa xeyri də görünmürdü. Ayxan Abbasov özünü göstərmək üçün Şahini çağırmadı. Çünki 20 yaşlı futbolçunun dərin ehtiyatda qalmağından U-21-də aparıcı futbolçulardan biri olması daha məsləhətlidi. Xəyal Əliyev də həmçinin. Hücum xətti isə çoxlarını üzdü. Rüfət Abdullazadə hələ də milli komandaya qədəm qoya bilmir. “Varajdin”də göstərdiyi performansla xorvatların qəlbinə yol tapan Abdullazadə Abbasovun gözündə ən yaxşılardan biri deyil.

Bəs Abdullazadənin yerinə, ümumiyyətlə, hücum xəttinə kimlər çağırılıb? Musa Qurbanlı, Nəriman Axundzadə, Renat Dadaşov və Mahir Emreli. Musa elə də pis çıxış etmir. Amma yaxşı da deyil. “Qarabağ”ın üçüncü hücumçusudu. “Ferentsvaroş”la oyunda qol vursa da, çempionatda artıq hesabına iki qol yazdırsa da, üç mövsüm əvvəlki optimal formasından uzaqdı. Amma çağırmayıb neyləyəsən? Başqa hücumçularımızdan ki yaxşıdı. Hazırki vəziyyətdə azı ikisindən. Qeyd edək ki, Musa son bir ayda cəmi 175 dəqiqə meydanda olub. Bu göstəricidə hücum xəttində liderdi.
Nəriman isə 104 dəqiqə oynayıb. Elə son milli toplanışında zədələndiyinə görə bir neçə həftəliyə sıradan çıxmışdı. Yavaş-yavaş formasını bərpa etməkdədi. Renat Avropa macərası yaşayır. Sanki tura çıxıb. Hər altı ayda bir ölkəyə, bir kluba gedir. Heç birində də fərq yarada bilmir. Son bir ay ərzində cəmi 75 dəqiqə meydanda olub.

Mahir Emreli… Yəqin ki, son bir ayda neçə oyuna çıxdığını bilirsiz – 0! Son milli toplanışının əvvəlindən öz komandasında zədə adı ilə heç ehtiyatda belə görünmür. Məşqdə vurduğu qolları, ötürmələri paylaşmaqla məşğuldu. Oyun praktikası yoxdu. Amma milliyə çağrıldı. Nəyə görə? Hansı hərəkətinə görə? Bu barədə Ayxan Abbasova sual verildi, cavabı isə belə oldu: “Mahir komandamızın ən güclü futbolçusudu”.
Vay o yığmanın halına ki, ən yaxşısı iki aya yaxındı ehtiyat oyunçular skamyasında oturmağa belə layiq görülmür!

MÜZƏFFƏR QULUZADƏ