İranlı futbolçunun müharibədə iştirak etmək istəməsi yalan imiş
İranın faktiki olaraq ABŞ və İsrailə qarşı müharibə aparması fonunda Mehdi Taremi ilə bağlı ortaya diqqətçəkən iddia atılıb.
"Football-plus.az" xəbər verir ki, karyerasını ''Olimpiakos''da davam etdirən iranlı forvardın klub rəhbərliyinə müraciət edərək vətəninə dönmək və müharibədə iştirak etmək istədiyi bildirilib.
Bu iddianı İtaliyanın ''Tuttosport'' nəşri ortaya atıb. Xəbərdə qeyd olunub ki, guya təcrübəli forvard rəhbərliyə ''vətənimin mənə ehtiyacı var'' deyib. Ancaq həm futbolçunun təmsilçisi, həm də ''Olimpiakos'' bu iddiaları təkzib edib.
Daha öncə ''Portu'' və ''İnter''də də top qovmuş 33 yaşlı futbolçunun təmsilçisi Federiko Pastorello bunları deyib:
''Son günlər Mehdi Tareminin ağzından çıxmış kimi göstərilən, amma reallıqla heç bir əlaqəsi olmayan açıqlamalar ortalıqda dolaşmaqdadı. Taremi Afinada çalışmalarını davam etdirir və peşəkar karyerasını ən yaxşı şəkildə davam etdirməyə köklənib. Belə bir həssas dönəmdə yalan xəbərlərdən və şərhlərdən qaçmaq lazımdı. Hər kəsin məsuliyyət çərçivəsinə və hörmətinə güvənirik''.
''Olimpiakos''un prezident köməkçisi Kostat Karapapas isə bunları deyib:
''Savaşın ilk qurbanı hər zaman reallıqdı. Saxta xəbərlərə inanmayın. İdmançılara, vətəni alovlar içində olan bütün insanlara hörmətlə yanaşaq. Dünyanın hər bir ölkəsini yaxından-uzaqdan maraqlandıran, bütün kainatın diqqətində olan bir məsələdən danışırıq. Təəssüf ki, hər ağlına gələni yazan və bunu təbliğ edən insanların qarşısını kəsə bilmirik''.
Taremi ötən ilin yayında da dünya mətbuatında gündəm olmuşdu. O, İsrailin İranı bombalaması üzündən vətənindən ayrıla və Klublararası DÇ-də iştirak edən ''İnter''in düşərgəsinə yollana bilmirdi.
Bu futbolçu bu mövsüm ''Olimpiakos''da 31 rəsmi oyunda aktivinə 16 qol, 5 məhsuldar ötürmə yazıb.
Digər xəbərlər
