Karlo Ançelotti Braziliya yığmasını daha uzun müddət çalışdırmaq imkanına malikdi. Baş məşqçi yerli futbol təşkilatı ilə yeni müqavilə imzalamağa yaxındı.

"Football-plus.az" xəbər verir ki, italiyalı mütəxəssis Braziliya Futbol Konfederasiyası (BFK) ilə 4 illik yeni müqavilə bağlayacaq. Sənədlər hələ rəsmi şəkildə imzalanmasa da, tərəflər arasında şifahi razılıq əldə olunub və bu məsələ artıq formal xarakter daşıyır.

Xatırladaq ki, Ançelotti Braziliya yığmasına 2025-ci ilin mayından rəhbərlik edir. Onun komandası ötən müddətdə keçirdiyi 8 oyunda 4 qələbə qazanıb, 2 dəfə heç-heçə edib və 2 məğlubiyyətlə üzləşib. Ançelottinin BFK ilə hazırkı müqaviləsinin müddəti DÇ-2026-nın final mərhələsinin sonuna qədərdi.

Yeri gəlmişkən, Ançelotti Neymarı mart ayında Fransa və Xorvatiya ilə keçiriləcək yoldaşlıq oyunları üçün yığmaya çağırmamaq qərarına gəlib. ESPN-in məlumatına görə, baş məşqçi oyunçuların fiziki hazırlığına diqqət yetirir və hücumçunun uzunmüddətli zədədən tədricən sağalmasını zəruri sayır.

“Santos”un oyunçusu diz zədəsi səbəbindən cari mövsümün böyük bir hissəsini buraxıb və Ançelotti onu mart ayında Boston və Orlandoda keçiriləcək oyunlar üçün heyətə daxil etməmək qərarına gəlib. O, əsas mövqelərdəki digər oyunçuların, o cümlədən müdafiəçilərin və hücumçuların vəziyyətini qiymətləndirməyə üstünlük verib.

Bir müddət əvvəl Neymarın fevralda tədricən meydana qayıdacağı gözlənilirdi, lakin Ançelotti onun iştirakının yoldaşlıq oyunları üçün vacib olmadığını düşünür. Futbolçunun fiziki və texniki hazırlığının qiymətləndirilməsindən sonra dünya çempionatında iştirakı ilə bağlı yekun qərarın mayda verilməsi planlaşdırılır.