Artıq bir neçə gündü Karlo Ançelottinin yeni iş yeri ilə bağlı xəbərlər səngimir. O, hazırda “Real”ın başında olsa da, bu komandadan tezliklə ayrılacağı gün kimi aydındı.

"Football-plus.az" xəbər verir i, qarşıdakı günlərdə gözlənilməz nəsə baş verməsə, italiyalı mütəxəssis Cənubi Amerikaya yollanacaq.

Bu barədə Fabritsio Romano məlumat yayıb. Tanınmış insayder Braziliya Futbol Konfederasiyasının (BFK) Ançelotti ilə ilkin razılığa gəldiyini bir daha bildirib. 65 yaşlı məşqçi “Real”ı 2021-ci ildən çalışdırır. O, bu komandaya 2013-15-ci illərdə də başçılıq edib.

“Marca” qəzetinin bir neçə gün əvvəlki məlumatına görə, Ançelotti tezliklə dünyanın ən yüksək ödənişli məşqçisi olacaq. Artıq bu planda bir sıra detallara aydınlıq gəlib. İspaniya mənbələrinin məlumatına görə, o, BFK ilə ilkin razılaşmasına əsasən, aya 625200 avro qazanacaq.

Bundan əlavə, Braziliya yığması 2026-cı ildə keçiriləcək dünya çempionatının qalibi olacağı halda mütəxəssis 5 milyon avro mükafat da alacaq. Müqavilədə həmçinin bəzi cəlbedici bəndlər də nəzərdə tutulub. Bunlardan biri də məşqçinin bir neçə dəfə Avropaya səyahət etməsi üçün şəxsi təyyarə ayrılmasıdı. Ançelotti 14 ay - yəni, növbəti dünya çempionatının sonuna qədər komandaya rəhbərlik etməli olacaq. Müqaviləyə Braziliya yığması ilə “Real” arasında yoldaşlıq oyununun təşkili də daxildi.

BFK rəhbərliyi Ançelotti ilə müqaviləni mayın 12-də - İspaniya çempionatında keçiriləcək “Barselona” – “Real” matçının ertəsi günü rəsmiləşdirmək istəyir.
Amma ortada həllini gözləyən bir məsələ də var. Romanonun məlumatına görə, bir müddət əvvəl şifahi razılıq əldə olunsa da, müqavilə imzalanmayıb. Buna səbəb “Real”ın ayrılma şərtlərinə “yaşıl işıq” verməməsidi. Madrid klubu italiyalı mütəxəssisin mümkün gedişi ilə bağlı heç bir təzminat ödəmək niyyətində deyil. Braziliya futbolunun başbilənləri isə bu mövzuda qərarın qısa zamanda verilməsini istəyir və çox gözləmək niyyətində deyillər. 

Belə görünür, Ançelotti müqavilə üzrə ona çatmalı olan maaşdan imtina etməli olacaq. Onun “Real”la müqaviləsinin müddəti 2026-cı ilin yayına qədərdi.