Premyer-liqada 2-ci dövrə də arxada qaldı və hadisələrin indiyəqədərki axarı bizi daha bir maraqlı dövrənin gözlədiyin deməyə əsas verir. Əlbəttə, söhbət ilk növbədə çempionluq intriqası ilə bağlıdı ki, “Qarabağ” son 11 ildəki hegemonluğu itirməyə çox yaxındı. Amma bu tur təkcə heç-heçələrin çoxluğu, çempionluğa iddialıların oyunu ilə yox, başqa maraqlı məqamlarla da yadda qaldı.

Mənə elə gəlir ki, 2-ci dövrənin son turunun oyunları “Sumqayıt”la “Araz-Naxçıvan”ın avrokuboklar vəsiqə iddiasının perspektivsizliyini göstərdi. Autsayder “Kəpəz” önündə darmadağın olan “gənclik şəhəri”nin təmsilçisi Avropada nə edə bilər ki? Və ya prinsipial oyunda “Zirə”yə uduzan naxçıvanlıların yayda avrokuboklarda oynamağa nə dərəcədə haqqı var? Belə eniş-yoxuşlu qrafiklə hədəfə çatmaq çətin olacaq. Hələ mən onu demirəm ki, “Araz-Naxçıvan”ın rəhbərlərinin cinayət məsuliyyətinə cəlb olunması, yəni klub ətrafında ab-havanın pozulmasıyla bağlı da ciddi informasiyalar var. Bir sözlə, yavaş-yavaş “Sumqayıt”la “Araz-Naxçıvan”ı Avropa yolçuları siyahısından çıxarmaq lazımdı. Yox, Saşa İliçin komandası kubokda qalır və serb çalışdırıcı, deyəsən, həmin yolu daha perspektivli görür.

Avrokuboklara iddiasını gizlətməyənlərdən biri də “Neftçi”di. “Ağ-qaralar” Şamaxıda eyniadlı komandaya qalib gəlsəydi, “Sumqayıt”ı arxada qoyacaq, “Araz-Naxçıvan”a çatacaq və “Zirə”yə isti nəfəsini hiss etdirəcəkdi. Amma Kamranbəy Rəhimov VAR otağında əyləşən Cavid Cəlilovun da təsiri ilə “ağ-qaralar”ın qələbəsini, belə demək mümkünsə, “oğurladı”. Mustafa Sekin o hərəkətinə görə uzatma dəqiqələrində çox bəsit penalti verildi. Yuri Vernidubun oyundan sonra işlətdiyi “sanki bizim yaxşı nəticə göstərməyimizi istəmirlər” ifadəsi də havadan götürülməyib. İndi hər kəs səbirsizliklə Rəhim Həsənovun izahatını gözləyir ki, qalmaqallı hakim qərarı ilə bağlı suallarına cavab tapsın. Yeri gəlmişkən, sonda bu qalmaqal məqamına bir daha dönəcəm.

Şənbə gününün digər oyununda “Qəbələ” “Karvan-Yevlax”ın müqavimətini qıra bilmədi. Halbuki “Kəpəz”in bir gün əvvəlki qələbəsi fonunda “qırmızı-qaralar”ın 3 xala ehtiyacı böyük idi. Kaxaber Sxadadzenin komandası bacarmadı. Ümumiyyətlə, “Qəbələ”nin sabitlik yaxalaya bilməməsi ilk növbədə baş məşqçini düşündürməlidi. Ki, sabah elitada yerini qorumaq uğrunda pley-off oyunları keçirmək məcburiyyəti ilə üzləşməsin.

Bazar günü qeydə alınan heç-heçələr fərqli assosiasiya doğurdu. “Turan Tovuz” son 9 çempionat oyununda qələbəyə həsrət qalan “İmişli”ni məğlub etməklə “Zirə” ilə aradakı 5 xal fərqini qoruya bilərdi. Ancaq tovuzluların qələbə yolunda fədakarlıq etdiyini demək olmaz. Bu heç-heçə Aran təmsilçisinə özünəinam qazandırdı, “bozqurd”a isə sadəcə, 1 xal.

Turun ən böyük maraq doğuran oyunu heç-heçə bitdi. 0:3-ü 3:3-ə çevirdiyini nəzərə alsaq, əslində “Qarabağ” “Sabah”la oyunda qazandığı 1 xalı qənimət saya bilər. Amma iş ondadı ki, komandalar arasındakı 7 xal fərqi qorundu və bu mənada ağdamlıları sevindiricək nəsə yoxdu. Mümkün qələbə çempionu daha inamlı edəcək, hətta bəlkə də növbəti qəhrəmanlıqlara daşıyacaqdı. İndi Qurban Qurbanov və komandası yalnız hadisələrin axarını izləməyə və “Sabah”ın büdrəməsini gözləməyə məcburdu. İstənilən halda, bizi maraqlı bir dövrdə gözləyir. Sürprizlər ola da bilər, olmaya da...
Qalmaqallar deyərkən mən həm də bu oyunu nəzərdə tuturdum. Tural Qurbanovun idarəçiliyi qətiyyən oyunun statusuna uyğun gəlmədi. AFFA Hakimlər Komitəsi belə həssas oyunlara təyinatlar zamanı yüz ölçüb, bir biçməlidi. Yoxsa irəlidə bizi daha böyük qalmaqallar gözləyir.

Misli premyer-liqası
2-ci dövrə, 22-ci tur
27 fevral
Kəpəz – Sumqayıt 3:0
Araz-Naxçıvan - Zirə 0:1
28 fevral
Şamaxı – Neftçi 2:2
Qəbələ - Karvan-Yevlax 1:1
1 mart
Turan Tovuz – İmişli 0:0
Qarabağ – Sabah 3:3

1. Sabah 22 16 5 1 45-15 53
2. Qarabağ 21 14 4 3 39-16 46
3. Turan Tovuz 22 12 5 5 27-14 41
4. Zirə 22 10 8 4 29-22 38
5. Araz-Naxçıvan 22 9 6 7 31-36 33
6. Sumqayıt 22 9 4 9 31-30 31
7. Neftçi 21 7 10 4 30-20 31
8. Şamaxı 22 6 8 8 23-26 26
9. İmişli 22 4 9 9 18-25 21
10. Kəpəz 22 5 1 16 17-45 16
11. Qəbələ 22 4 4 14 19-29 16
12. Karvan-Yevlax 22 1 4 17 14-45 7

Bombardirlər: Coy-Lens Mikels (Sabah) - 10, Velko Simiç (Sabah), Bassala Sambu (Neftçi) – 9, Karim Rossi (Şamaxı) – 8.

Növbəti turun oyunları martın 7-10-u aralığında keçiriləcək: Karvan-Yevlax – Sumqayıt, Şamaxı – İmişli, Qarabağ – Araz-Naxçıvan, Zirə - Kəpəz, Neftçi – Turan Tovuz, Sabah – Qəbələ.

ORXAN